UFC 308, ელ კლასიკო და სხვა - 26-27 ოქტომბრის სპორტული მოვლენები

26-27 ოქტომბერს სპორტული მოვლენებით დახუნძლული უიქენდი გველის. გულშემატკივრების ყურადღება მსოფლიოს გარშემო სხვადასხვა არენისკენ იქნება მიმართული.

მიუხედავად საფეხბურთო ციებ-ცხელებისა, რომელსაც აუცილებლად შევეხებით, ქართველებისთვის სპორტის მხრივ მთავარი ყურადღების ცენტრში აბუ დაბი იქნება, სადაც UFC 308 გაიმართება. აღნიშნულ ღონისძიებაზე ქვემსუბუქი წონის ქართველი ჩემპიონი ილია თოფურია თავის ქამარს პირველად დაიცავს გამოცდილი მაქს ჰოლოუეის წინააღმდეგ. მეინ ქარდზე სხვა საინტერესო ბრძოლებიც გაიმართება, მათ შორის კო-მეინ ივენთი რობერტ უიტაკერსა და ხამზატ ჩიმაევს შორის. UFC 308-ის მეინ ქარდი 26 ოქტომბერს 22:00 საათზე დაიწყება.

MMA-სა და ფეხბურთის გულშემატკივრები კმაყოფილი არ იქნებიან იმით, რომ UFC 308-ის პარალელურად საფეხბურთო სამყაროს ერთ-ერთი მთავარი დაპირისპირება, ელ კლასიკო გაიმართება. მადრიდში, სანტიაგო ბერნაბეუზე რეალი ბარსელონას მიიღებს. მატჩი 26 ოქტომბერს 23:00 საათზე ჩატარდება. განსაკუთრებით უკმაყოფილო ესპანელი გულშემატკივრები აღმოჩდნენ, რომლებმაც პროტესტიც გამოხატეს ელ კლასიკოს იმ დროს დანიშვნაზე, როცა ილია თოფურიამ უნდა იჩხუბოს.

ლა ლიგაში ქართველებისთვის კიდევ ერთი საინტერესო მატჩი 27 ოქტომბერს (19:15) ჩატარდება, სადაც გიორგი მამარდაშვილის ვალენსია ხეტაფეს ესტუმრება.

საინტერესო უიქენდი გველის იტალის სერია ა-ში, 26 ოქტომბერს (17:00) ხვიჩა კვარაცხელიას ნაპოლი ლეჩეს მიიღებს, 27 ოქტომბერს (15:30) საბა გოგლიჩიძის ემპოლი პარმას ეწვევა, ტურის ცენტრალური მატჩი კი ჯუზეპე მეაცაზე გაიმართება, სადაც ინტერი იუვენტუსს დაუპირისპირდება (27 ოქტომბერი, 21:00). სერია ა-ს სატურნირო ცხრილში ნაპოლი პირველ ადგილზეა, ინტერი - მეორეზე, იუვენტუსი კი - მესამეზე.

საინტერესო შეხვედრას ვიხილავთ პრემიერ ლიგის მე-9 ტურში. ემირეითსზე არსენალისა და ლივერპულის მატჩი შედგება. მერსისაიდელები სატურნირო ცხრილს ლიდერობენ, მე-3 ადგილზე მყოფი ლონდონელები კი მათ 4 ქულით ჩამორჩებიან. საინტერესო სამწვრთნელო დუელი იქნება მიკელ არტეტასა და არნე სლოტს შორისაც.

საფრანგეთის ლიგა 1-ში ზურიკო დავითაშვილის სენტ-ეტიენი ანჟერს ესტუმრება, გიორგი მიქაუტაძის ლიონი კი ოსერს დაუპირისპირდება (27 ოქტომბერი, 18:00), თუმცა მთავარი მატჩი ველოდრომზე გაიმართება, სადაც ფრანგულ კლასიკაში მარსელი პსჟ-ს დაუხვდება (27 ოქტომბერი, 23:45).

საინტერესო მატჩები გველის ოკეანის მიღმაც. 26 ოქტომბერს (04:30) საბა ლობჟანიძის ატლანტა MLS-ის პლეიოფში ლეო მესის ინტერ მაიამის ეთამაშება. სტარტი აიღო NBA-ს რეგულარულმა სეზონმაც. 26 ოქტომბერს (03:00) გოგა ბითაძის ორლანდო მეჯიქი ბრუკლინ ნეტსს დაუპირისპირდება, 27 ოქტომბერს (04:30) კი სანდრო მამუკელაშვილის სან ანტონიო სპურსის მეტოქე ჰიუსტონ როკეტსი იქნება.