უნდა იყოს თუ არა რონალდუ ძირითადში?

2003 წლის 20 აგვისტოს, ყაზახეთთან ამხანაგურ მატჩში, კრიშტიანუ რონალდუს ეპოქალური სანაკრებო კარიერა დაიწყო.

დღეს, 41 წლის ასაკში, იგი რეკორდულ, მეექვსე მსოფლიო ჩემპიონატზე საასპარეზოდ ემზადება. 143 გოლით ის საერთაშორისო ფეხბურთის ისტორიაში საუკეთესო ბომბარდირია, თუმცა მუნდიალის წინ პორტუგალიაში მისი როლის შესახებ დისკუსია სულ უფრო მწვავდება.

თუ ადრე რონალდუს კრიტიკა ღალატის ტოლფასი იყო, დღეს რეალობა შეიცვალა. 1966 წლის მუნდიალის ბრინჯაოს პრიზიორი ანტონიო სიმოეში პირდაპირ ამბობს:

ის მოსაგებად კი არა, მთავარი ფიგურა რომ იყოს, იმისთვის თამაშობს. ეს ეუსებიოს სრული ანტიპოდია. ფაქტებს თვალს უნდა გავუსწორო

მიუხედავად კრიტიკისა, ნაკრების მთავარი მწვრთნელი რობერტო მარტინესი ამ დებატებს ჭორებს უწოდებს და სტატისტიკაზე მიუთითებს – რონალდუმ ბოლო 31 მატჩში 25 გოლი გაიტანა:

ის აქ იმიტომ არის, რომ კვლავ უმაღლეს დონეზე თამაშობს და არა წარსული დამსახურებების გამო

თუმცა, ფაქტია, რომ მარტინესის მოსვლის შემდეგ პორტუგალიამ თავისი ყველაზე დიდი გამარჯვებები (9:0 ლუქსემბურგთან და 9:1 სომხეთთან) სწორედ კაპიტნის გარეშე მოიპოვა. ტელეკომპანია CNN Portugal-ის ანალიტიკოსი სოფია ოლივეირა მიიჩნევს, რომ რონალდუ სასტარტო შემადგენლობის ფეხბურთელი აღარ უნდა იყოს, მაგრამ ნაკრები მის გარეშე თამაშისთვის მზად არ არის.

ამავდროულად, ფეხბურთის ფედერაცია (FPF) რონალდუსთან იმდენადაა გადაჯაჭვული, რომ ახლახან კონტრაქტი მის მფლობელობაში არსებულ კომპანიასთანაც კი გააფორმა. ფედერაციის პრეზიდენტი პედრუ პროენსა კი აცხადებს, რომ პოსტ-რონალდუს ეპოქისთვის მზადება დრამატიზების გარეშე მიმდინარეობს, თუმცა აღიარებს, რომ კრიშტიანუსა და ფედერაციის ბრენდები ერთმანეთს ემთხვევა.

რონალდუს მუნდიალზე 8 გოლი აქვს გატანილი და ეუსებიოს რეკორდამდე მხოლოდ 1 ბურთი აშორებს, თუმცა მისი მთავარი ოცნება კარიერის ბოლო მსოფლიო ჩემპიონატზე ოქროს თასის აღმართვაა.