VIDEO: რონალდუს გარეშე - პორტუგალიამ გასვლაზე დანია დაამარცხა
01 ოქტ, 2026 · 0 წთ წასაკითხად
-
Aa
+
ფონტის ზომა
პორტუგალიამ UEFA-ს ერთა ლიგის A4 ჯგუფში იდეალური სერია გააგრძელა.
პორტუგალიელებმა კოპენჰაგენში დანია დრამატულ შეხვედრაში 4:2 დაამარცხეს. ამ გამარჯვების შემდეგ „სელესაოს“ ბოლო 13 მატჩში მხოლოდ 1 მარცხი აქვს (9 მოგება, 3 ფრე).
მატჩის წინ საუბრის მთავარი თემა კრიშტიანუ რონალდუს განაცხადს მიღმა დარჩენა იყო, თუმცა პორტუგალიამ შესაძლო უთანხმოებასთან დაკავშირებული ეჭვები მალევე გაფანტა და ანგარიში პირველივე 15 წუთში გახსნა.
გონსალუ რამოშმა ჟოაუ კანსელუსთან შესანიშნავი კომბინაცია გაითამაშა, ფულბეკმა მასპინძელთა დაცვა გაარღვია და მადს ჰერმანსენს ცივსისხლიანად გაუტანა.
მიუხედავად ამისა, დანიამ წონასწორობა 23-ე წუთზე აღადგინა: იოაკიმ მეჰლეს გადაცემის შემდეგ მიკელ დამსგორმა ბურთი შორეულ კუთხეში შესანიშნავად გადაგზავნა.
პორტუგალიამ, რომელსაც ბოლო 7 გასვლით მატჩში 5 გამარჯვება ჰქონდა მოპოვებული (1 ფრე, 1 მარცხი), უპირატესობა სულ რაღაც 3 წუთის შემდეგ დაიბრუნა.
ბრუნო ფერნანდეშის პასის შემდეგ რამოშმა ზუსტი დაბალი დარტყმით ჰერმანსენს შანსი არ დაუტოვა. მილანის თავდამსხმელისთვის ეს ბოლო 4 დღეში ნაკრებში გატანილი მე-2 გოლი იყო და მან ახალი მთავარი მწვრთნელის, ჟორჟე ჟეზუშის ნდობა კიდევ ერთხელ გაამართლა.
მეორე ტაიმი დანიამ აქტიურად დაიწყო და ბრაიან რიმერის გუნდმა 53-ე წუთზე მატჩში მეორედ გაათანაბრა ანგარიში.
ამჯერად დამსგორი ასისტენტის როლში მოგვევლინა, მან რასმუს ჰოილუნდი მეკარესთან პირისპირ დატოვა, დანიელმა თავდამსხმელმა კი სიმშვიდე შეინარჩუნა და ბურთი წინ გამოსულ დიოგუ კოშტას თავზე ოსტატურად გადაუგდო.
გოლის შემდეგ ჰოილუნდმა კრიშტიანუ რონალდუს ცნობილი აღნიშვნაც გაიმეორა.
ამ ეპიზოდმა პორტუგალია კვლავ გაააქტიურა და გაფუჭებული მომენტების მიუხედავად, მე-3 გოლი მაინც გაიტანეს. 67-ე წუთზე ბრუნო ფერნანდეშის ჩაწოდების შემდეგ ვიტინიამ თავური დარტყმით ბურთი კარში გადაგზავნა.
მას შემდეგ, რაც პორტუგალიამ შეხვედრაში უპირატესობა უკვე ორჯერ დაკარგა, სტუმრები დასკვნით წუთებში თამაშის გაკონტროლებას შეეცადნენ. ჟორჟე ჟეზუშმა სათადარიგოთა სკამიდან ჟოაუ ნევეში და ჟოაუ ფელიქსი ჩართო თამაშში.
საბოლოოდ, სწორედ ფელიქსმა დაუსვა წერტილი „სელესაოს“ შთამბეჭდავ გამარჯვებას, დიოგუ დალოს გადაცემის შემდეგ მან ზუსტი დარტყმით საბოლოო ანგარიში, 4:2 დააფიქსირა.
ამ გამარჯვებით პორტუგალიამ A4 ჯგუფში ზედიზედ მე-3 მატჩი მოიგო და სატურნირო ცხრილში ლიდერობა კიდევ უფრო გაიმყარა.
