ვიდეო: სენტ-ეტიენმა დავითაშვილი წარადგინა

უკვე ოფიციალურად ზურიკო დავითაშვილი სენტ-ეტიენის ფეხბურთელია. ინფორმაციას კლუბის ოფიციალური გვერდიც ადასტურებს.

ქართველმა მოთამაშემ საფრანგეთის 10-გზის ჩემპიონთან კონტრაქტი 2028 წლამდე გააფორმა. ბორდო კი ტრანსფერში 6 მილიონ ევროს მიიღებს.

"პატივია ამ ისტორიულ კლუბში გადმოსვლა. ძალიან ბედნიერი ვარ აქ ყოფნით და ერთი სული მაქვს, როდის ვითამაშებ საოცარი გულშემატკივრების წინაშე. ლიგა 1 რთული ჩემპიონატია და ეს ჩემთვის დიდებული გამოწვევაა" - განაცხადა ზურიკომ.

"ზურიკო ტექნიკურად მეტს შეგვმატებს და მისი საერთაშორისო გამოცდილებაც ასეთ ახალგაზრდულ ასაკშიც დაგვეხმარება. ის როგორც კარგი მეპასე, ისე მომენტის დამსრულებელია. მას ძალიან საინტერესო თამაშის სტილი აქვს, რაც ჩვენ ბურთის შენარჩუნების მეტ შესაძლებლობას მოგვცემს." - განაცხადა სენტ-ეტიენის მთავარმა მწვრთნელმა ოლივიე დალოლიომ.

დავითაშვილმა ლიგა 2-ის გასულ სეზონში ბორდოს შემადგენლობაში 8 გოლი და 8 საგოლე გადაცემა მიითვალა.

სენტ-ეტიენის გვერდმა ზურიკოს ტრანსფერს სპეციალური ვიდეოც მიუძღვნა, სადაც დავითაშვილს საქართველოს ჰიმნით ეგებებიან.