ვიდეო: ატლანტაში საბას დრო არ ჩერდება - ლობჟანიძის გოლი

ოკეანის გაღმა სტარტი აიღო ლიგის თასმა, რომელიც ყოველწლიური საფეხბურთო გათამაშებაა, სადაც მონაწილეობას ამერიკული, კანადური და მექსიკური გუნდები იღებენ. ტურნირზე 45 გუნდი 15 ჯგუფად არის განაწილებული.

თავისი პირველი მატჩი გამართა ატლანტა იუნაიტედმა, რომელიც DC იუნაიტედს დაუპირისპირდა.

სასტარტო შემადგენლობაში იყო საბა ლობჟანიძე, რომელმაც თამაში სრულად ჩაატარა.

შეხვედრა უხვგოლიანი გამოდგა, განსაკუთრებით საინტერესო იყო პირველი ტაიმი, რომელიც 2-3 მორჩა. ქართველმა ფეხბურთელმა ლამაზი გოლი 39-ე წუთზე გაიტანა და პირველი ტაიმის საბოლოო ანგარიშიც დააფიქსირა.

81-ე წუთზე დანიელ რიოსმა პენალტის საშუალებით ანგარიში გაათანაბრა და ატლანტას ქულა მოუპოვა. ტურნირის წესების მიხედვით ჯგუფური ეტაპის მიუხედავად, პენალტების სერია მაინც დაინიშნა, სადაც გამარჯვებული გუნდი დამატებით ქულას იღებდა.

ქართველმა თავისი შანსი აქაც გამოიყენა, თუმცა ატლანტამ თერთმეტმეტრიანებში 5-6 წააგო და მხოლოდ 1 ქულას დასჯერდა, 2 ქულა კი DC იუნაიტედმა მოიპოვა.

ატლანტას ჯგუფში მესამე გუნდი მექსიკური სანტოს ლაგუნაა.

საბა ლობჟანიძის ანგარიშზე ბოლო 3 მატჩში 2 გოლი და 3 საგოლე გადაცემაა.