ოქროს ბურთის 2026 წლის ნომინანტების გამოქვეყნებამ ფეხბურთის ისტორიაში უჩვეულო ფაქტი დააფიქსირა.
1995 წლის შემდეგ, როცა 30-კაციანი სიის სისტემა დაინერგა, პირველად მოხდა, რომ საუკეთესოთა შორის არცერთი მეკარე არ არის.
ფრანგული გამოცემა L'Équipe-ის ცნობით, ეს ისტორიაში მხოლოდ მესამე შემთხვევაა 1967 და 1968 წლების შემდეგ, როცა ფინალურ რეიტინგში მეკარეები არ ფიგურირებენ. შესაბამისად, ლევ იაშინი კვლავ რჩება ერთადერთ მეკარედ, რომელმაც 1963 წელს ამ პრესტიჟული ჯილდოს მოპოვება შეძლო.
სიას მიღმა აღმოჩნდა ესპანეთის ნაკრებისა და ბილბაოს ატლეტიკის მეკარე უნაი სიმონი. მიუხედავად იმისა, რომ მსოფლიო ჩემპიონატის 7 მატჩში მან მხოლოდ 1 გოლი გაუშვა, ესპანელთა დაცვის საიმედო თამაშმა მისი უშუალო ჩარევის საჭიროება შეამცირა. ასევე სიაში ვერ მოხვდა მისი თანამემამულე დავიდ რაია, რომელმაც არსენალთან ერთად პრემიერლიგა მოიგო და ჩემპიონთა ლიგის ფინალში ითამაშა, თუმცა სანაკრებო დონეზე სათადარიგოთა სკამზე ჯდომამ იმოქმედა.
ნომინანტთა მიღმა დარჩნენ ემილიანო მარტინესი და ჯანლუიჯი დონარუმაც. ასტონ ვილას არგენტინელმა მეკარემ მსოფლიო ჩემპიონატის ფინალში ითამაშა და ევროპა ლიგა მოიგო, მანჩესტერ სიტის იტალიელ კარის დარაჯს კი მსოფლიო ჩემპიონატზე იტალიის ნაკრების ვერგასვლამ შეუშალა ხელი.
მეკარეების სრული იგნორირება 30-კაციან სიაში ერთგვარ ინტრიგას აბრუნებს საუკეთესო მეკარის ჯილდოსთვის ბრძოლაში. გასულ წლებში ნომინანტებს შორის მოხვედრილი ერთადერთი მეკარეების გამო გამარჯვებულის ვინაობა წინასწარვე ნათელი იყო, წელს კი კონკურენცია ბევრად უფრო საინტერესო და დაძაბული იქნება.
