46 წლის ლეგენდარული ბრაზილიელი, რონალდინიო 2015 წლის შემდეგ პირველ ოფიციალურ საფეხბურთო მატჩს ჩაატარებს.
კვირას, იტალიის სერია C-ს კლუბი რავენა ადგილობრივ დერბიში ფორლის დაუპირისპირდება და გულშემატკივრებისთვის უკვე დადასტურებულია, რომ ოქროს ბურთის მფლობელი მოედანზე პირველივე წუთებიდან გამოვა.
ბარსელონას და მილანის ყოფილი შემტევი რავენაში აგვისტოში, როგორც ინვესტორი, ისე მივიდა, თუმცა მისი საფეხბურთო ამბიციები ამით არ დასრულებულა. კლუბის მფლობელის, იგნაციო ჩიპრიანის თქმით, რონალდინიოს მიზანი რომანტიკულია, მას სურს კარიერაში საიუბილეო, მე-300 გოლი გაიტანოს. ჩიპრიანიმ ხაზგასმით აღნიშნა, რომ ეს გადაწყვეტილება მარკეტინგული ტრიუკი ნამდვილად არ არის და ლეგენდა მოედანზე მხოლოდ გულშემატკივრების მოსაზიდად არ გავა.
რავენას მთავარმა მწვრთნელმა, ანდრეა მანდორლინიმ განაცხადა, რომ ბრაზილიელი სამკაციან თავდასხმის ხაზში ითამაშებს, ხოლო იმას, თუ რამდენი წუთი დაჰყოფს ის მოედანზე, უშუალოდ მატჩის მსვლელობისას გადაწყვეტენ. რონალდინიო იტალიაში პარასკევს ჩავიდა და თანაგუნდელებთან ერთად კვირის მატჩამდე მხოლოდ ერთ ვარჯიშს ჩაატარებს. აღსანიშნავია, რომ გუნდის თავდამსხმელის, სიმონე რაბის განცხადებით, მატჩში დანიშნულ ნებისმიერ პენალტს სწორედ ბრაზილიელი ვარსკვლავი შეასრულებს.
ბრუნო ბენელის სახელობის სტადიონზე ისტორიული მოვლენისთვის საგანგებოდ ემზადებიან. გულშემატკივრების დიდი რაოდენობის გამო არენაზე დროებითი ტრიბუნაც კი დაამონტაჟეს, რათა მსოფლიო ჩემპიონის, შესაძლოა უკანასკნელი, საფეხბურთო შოუ რაც შეიძლება მეტმა ადამიანმა იხილოს. ცნობისთვის, 13 ტურის შემდეგ რავენა სატურნირო ცხრილში მეორე ადგილს იკავებს და წარმატებული სერიის გაგრძელებას უკვე რონალდინიოსთან ერთად ეცდება.