ელ კლასიკო სუპერკოპაზე - რეალის მე-14 თუ ბარსას მე-15?

დღეს ესპანეთის სუპერ თასის ფინალში, რომელიც საუდის არაბეთში ტარდება, ელ კლასიკო გაიმართება.

ტურნირის 1/2 ფინალში ბარსელონამ ბილბაოს ატლეტიკი დაამარცხა 2-0, მადრიდის რეალმა კი მალიორკას სძლია ანგარიშით 3-0.

ესპანეთის სუპერ თასი 1982 წლიდან იმართება. 2018 წლამდე გამარჯვებული ლა ლიგისა და კოპა დელ რეის მფლობელებს შორის ირკვეოდა.

2019 წლიდან კი ფორმატი 4-გუნდიანი გახდა და მონაწილე გუნდები ლა ლიგის პირველ და მეორეადგილოსნებთან ერთად, კოპა დელ რეის ფინალისტებიც არიან.

გასაკვირი არ იქნება თუ გეტყვით, რომ ბარსელონა და რეალი მოგებული სუპერ თასების რაოდენობით მოწინავე ადგილებზე არიან. სიას ბლაუგრანა ლიდერობს 14 ტიტულით, რეალს კი 13 სუპერკოპა აქვს მოგებული.

ასე რომ, მადრიდელებს დღეს შეუძლიათ მთავარ კონკურენტს გაუთანაბრდნენ, ბარსელონას კი შანსი აქვს რეალთან სხვაობა გაზარდოს.

სუპერ თასის ფინალში ელ კლასიკო ზედიზედ მესამედ იმართება. 2023 წელს ბარსელონამ 3-1 იმარჯვა, 2024 წელს კი რეალმა შეძლო მეტოქის 4-1 დამარცხება.

მატჩი 23:00 საათზე დაიწყება, შეხვედრის მთავარი არბიტრი ხილ მანსანო იქნება.