ანტონიო რუდიგერმა გერმანიის ნაკრებში კარიერა დაასრულა.
მცველი ამიერიდან მთლიანად საკლუბო კარიერაზე და მადრიდის რეალზე იქნება კონცენტრირებული.
რუდიგერი გერმანიის ნაკრებს Instagram-ზე გამოქვეყნებული ემოციური წერილით დაემშვიდობა:
„გარკვეული დროის განმავლობაში ბევრი ფიქრის შემდეგ, დადგა მომენტი, როდესაც გადავწყვიტე, ეროვნული ნაკრების კარიერა დავასრულო და გზა ახალგაზრდა თაობას დავუთმო.
როდესაც 2014 წელს პირველად მოვირგე გერმანიის ნაკრების მაისური, ყველაზე თამამ ოცნებაშიც კი ვერ წარმოვიდგენდი, რომ საბოლოოდ ნაკრებში 86 მატჩს ჩავატარებდი.
მიუხედავად იმისა, რომ ბოლო ტურნირებზე დიდი ტიტულის მოგება ვერ შევძელით და რამდენიმე მტკივნეული მარცხის გადატანაც მოგვიწია, ეს პერიოდი ჩემთვის წარმოუდგენლად განსაკუთრებული თავი იყო - გამოცდილება, რომელიც სამუდამოდ ჩემთან დარჩება.
უდიდესი მადლობა მინდა გადავუხადო:
ჩემს თანაგუნდელებს: ერთად ჩატარებული თითოეული ბრძოლისთვის, გასახდელსა და სასტუმროში არსებული მეგობრული ატმოსფეროსთვის და, რაც მთავარია, იმ მეგობრობისთვის, რომელიც ფეხბურთის ფარგლებს გაცილებით გასცდება.
მთელ სამწვრთნელო და დამხმარე შტაბს: მადლობა წლების განმავლობაში გამოცხადებული ნდობისა და კულისებში გაწეული შრომისთვის. განსაკუთრებული მადლობა იოახიმ ლიოვს, ჰანსი ფლიკსა და იულიან ნაგელსმანს, რომლებიც გერმანიის ნაკრებში ჩემი გზის განმავლობაში გვერდით მედგნენ და ჩემს ჩამოყალიბებაში მნიშვნელოვანი როლი ითამაშეს. ასევე მადლობა ჩემს მენტორს ახალგაზრდულ ნაკრებებში, ჰორსტ ჰრუბეშს.
და, რა თქმა უნდა, თქვენ, გულშემატკივრებს: მადლობა მხარდაჭერისთვის, განსაკუთრებით იმ დაუვიწყარი ატმოსფეროსთვის, რომელიც 2024 წლის საშინაო ევროპის ჩემპიონატზე შექმენით.
ახლა ჩემთვის ახალი ეტაპი იწყება, რომელშიც მთლიანად ჩემს კლუბზე ვიქნები კონცენტრირებული.
მადლობა ერთად გავლილი ამ გზისთვის. თქვენი ტონი.“ - წერს რუდიგერი.
ანტონიო რუდიგერმა გერმანიის ეროვნულ ნაკრებში 12 წელი გაატარა და ჯამში ჩატარებულ 86 მატჩში 3 გოლი გაიტანა.
