ტალანტები გერმანიიდან - ვის იმატებს ბარსელონა?

ბარსელონამ გერმანული ფეხბურთის ერთ-ერთი ყველაზე პერსპექტიული ახალგაზრდა ტალანტი გაიფორმა.

Sky Sport-ის ინფორმაციით, კატალონიურმა კლუბმა ჰამბურგთან მიკაელ ბაზას ტრანსფერზე შეთანხმებას მიაღწია.

ახალგაზრდა ასაკის გამო ბაზას კონტრაქტის გაფორმება მხოლოდ 2029 წლამდე შეუძლია. წყაროს ცნობით, სამედიცინო შემოწმება და ხელშეკრულების გაფორმება სამშაბათს შედგება.

16 წლის ცენტრალური მცველი მომავლის ერთ-ერთ დიდ ტალანტად მიიჩნევა და ბარსელონა გეგმავს, რომ გრძელვადიან პერსპექტივაში ის ეტაპობრივად პირველი გუნდის შემადგენლობაში ჩართოს.

ტრანსფერი დამატებით ყურადღებას ბაზას ოჯახური კავშირის გამოც იქცევს, ახალგაზრდა ფეხბურთელი ბაიერნის მცველისა და გერმანიის ნაკრების ფეხბურთელის, ჯონათან ტას ბიძაშვილია.

ამასთან, მირზა კატოვიჩიც ბარსელონაში გადადის. შტუტგარტის 19 წლის ნახევარმცველი კატალონიურ კლუბთან იჯარის წესით გადასვლაზე შეთანხმდა, რის შესახებაც Cadena SER-მა გაავრცელა ინფორმაცია.

გარიგება ითვალისწინებს იჯარას გამოსყიდვის ვალდებულებით, რომლის ღირებულებაც 5-დან 10 მილიონ ევრომდე იქნება.

საბოლოო თანხა დამოკიდებული იქნება იმაზე, რამდენ შეხვედრას ჩაატარებს კატოვიჩი ბარსელონას პირველ ან მეორე გუნდში. იჯარის საფასური 600 ათასი ევროა.

ბარსელონას გეგმის მიხედვით, კატოვიჩი თავდაპირველად მეორე გუნდში ითამაშებს, თუმცა კატალონიელები მას მომავალში პირველი გუნდის წევრად განიხილავენ.

შტუტგარტში, მიუხედავად კარგი თამაშისა, კატოვიჩმა პირველ გუნდში დამკვიდრება ვერ მოახერხა. გასულ სეზონში მან კლუბის მესამე ლიგაში მოასპარეზე მეორე გუნდის შემადგენლობაში 29 მატჩი ჩაატარა და გამორჩეული თამაშით თავი კარგად წარმოაჩინა.