ეს ატლეტიკოა! - მადრიდელებმა სპარტა გაანადგურეს

უეფას ჩემპიონთა ლიგის მე-5 ტურში პრაღის სპარტამ საკუთარ მოედანზე მადრიდის ატლეტიკო მიიღო.

შეხვედრა სტუმართა დომინირებით განვითარდა და საბოლოოდ გამანადგურებელი ანგარიშითაც დასრულდა.

პირველ ტაიმში როხიბლანკომ ორი გოლის გატანა მოახერხა. მე-15 წუთზე ჯარიმიდან გატანილი გოლით ანგარიში ხულიან ალვარესმა გახსნა, ტაიმის ბოლოს კი, 43-ე წუთზე მარკოს ლიორენტემ გაზარდა სხვაობა ორამდე.

თამაშის მეორე ნახევარში ატლეტიკოს უპირატესობა კიდევ უფრო გაიზარდა. 59-ე წუთზე ალვარესმა დუბლი შეასრულა, 70-ე წუთზე თავისი გოლი ანტუან გრიზმანმაც გაიტანა.

85-ე და 89-ე წუთზე გატანილი გოლებით კი დუბლი ანხელ კორეამაც მიითვალა, ატლეტიკომ კი სპარტა 0-6 გაანადგურა.

სიმეონეს გუნდს 5 მატჩის შემდეგ 9 ქულა აქვს, პრაღელებს კი 4 ქულა რჩებათ.