ჰოლივუდის ვარსკვლავების, რაიან რეინოლდსისა და რობ მაკელჰენის მფლობელობაში არსებული უელსური კლუბი რექსჰემი მსოფლიო მედიის ყურადღების ცენტრში კიდევ ერთხელ მოექცა.
პრემიერ ლიგის ყოფილმა მწვრთნელმა, ტონი პულისმა განაცხადა, რომ გუნდს აქვს უნიკალური შანსი და ძალა, კლუბში ისეთი ლეგენდები მიიზიდოს, როგორებიც ლიონელ მესი, კრიშტიანუ რონალდუ და ნეიმარი არიან.
2021 წლის თებერვალში კლუბის შესყიდვის შემდეგ, ჰოლივუდურმა დუეტმა რექსჰემი დაბალი დივიზიონიდან გლობალურ ფენომენად აქცია. მთავარი მწვრთნელის, ფილ პარკინსონის ხელმძღვანელობით, გუნდმა ზედიზედ სამი დაწინაურება მოიპოვა და ჩემპიონშიპის სადებიუტო სეზონში მეშვიდე ადგილი დაიკავა - პლეი-ოფის ზონას სულ რაღაც 2 ქულა დააკლდა.
მიუხედავად იმისა, რომ ოქროს ბურთის მფლობელების გაფორმება ჩემპიონშიპის გუნდისთვის ფანტასტიკის სფეროდ მოსჩანს, პულისი მიიჩნევს, რომ რექსჰემმა ამბიციებს საზღვრები არ უნდა დაუწესოს. მწვრთნელის თქმით, უელსის ბუნება, კულტურა და ადგილობრივი სტუმართმოყვარეობა უნიკალური კოზირია:
„რექსჰემის შემდეგი დიდი ტრანსფერი? კრიშტიანუ, მესი, ნეიმარი - რატომაც არა? უელსი, განსაკუთრებით კი ჩრდილოეთ უელსი, საოცარი და ულამაზესი ადგილია. უბრალოდ უთხარით მათ, რომ აქ მზე არასდროს წყვეტს ნათებას და საჭმელი ფანტასტიკურია. თუნდაც წვიმიანი ამინდი იყოს, უელსელებზე თბილ ხალხს მსოფლიოში ვერსად იპოვით. აი, ეს არის მთავარი იარაღი სუპერვარსკვლავების ჩამოსაყვანად.“
კლუბის მთავარ მიზნად 2026/27 წლების სეზონში პრემიერ ლიგის საგზურის მოპოვება რჩება. ფილ პარკინსონი მიმდინარე შემადგენლობით კმაყოფილია, თუმცა აღიარებს, რომ უმაღლეს დონეზე გასასვლელად გუნდის გაძლიერება აუცილებელია. შეძლებენ თუ არა რეინოლდსი და მაკელჰენი მსოფლიო ფეხბურთის „დიდი სამეულიდან“ რომელიმეს უელსში ჩაყვანას, ამას დრო აჩვენებს.
