ინტერის მე-9 თუ მილანის მე-8 სუპერ თასი?

დღეს საუდის არაბეთის ქალაქ რიადში იტალიის სუპერ თასის ფინალი გაიმართება, სადაც დერბი დელა მადონინა შედგება.

სუპერკოპა იტალიანა 1988 წლიდან ტარდება. 2022 წლამდე გამარჯვებული პირდაპირ 2 გუნდს შორის ირკვეოდა, რომელიც სერია ა-სა და იტალიის თასის გამარჯვებულები იყვნენ.

2023 წლიდან კი ფორმატი 4-გუნდიანი გახდა, სადაც მონაწილეობას სერია ა-ს ჩემპიონი, მეორეადგილოსანი და იტალიის თასის ფინალისტები იღებენ.

სუპერ თასი ისტორიაში ყველაზე მეტჯერ (9) იუვენტუსს აქვს მოგებული, მოქმედი ჩემპიონი კი ინტერია, რომელმაც ზედიზედ 3-ჯერ მოახერხა ტიტულის მოგება. ნერაძურიმ იუვენტუსი, მილანი და ნაპოლი დაამარცხა მიყოლებით.

რაც შეეხება წლევანდელ გათამაშებას, 1/2 ფინალურ შეხვედრაში ინტერმა ატალანტა 2-0 დაამარცხა, მილანმა კი იუვენტუსს სძლია 2-1 და ფინალში გავიდა.

ინტერი შეეცდება სუპერ თასი ისტორიაში მეცხრედ მოიგოს და ყველაზე ტიტულოვან იუვენტუსს გაუთანაბრდეს.

მილანი კი ტიტულის მერვედ მოგებას უმიზნებს და ამ შედეგით სწორედ ინტერს გაუთანაბრდება. როსონერიმ ბოლოს 2016 წლის სუპერ თასი მოიგო, როცა პენალტების სერიაში იუვენტუსი დაამარცხა.

მილანური გუნდების ისტორიული სტატისტიკა სუპერ თასზე ასეთია: ინტერი (8 მოგება, 4 წაგება), მილანი (7 მოგება, 5 წაგება).

საინტერესოა, რომ ინტერი და მილანი ამ ტიტულისთვის მხოლოდ ორჯერ შეხვდნენ ერთმანეთს. 2011 წლის სუპერკოპაზე როსონერიმ ნერაძური 2-1 დაამარცხა, 2022 წლის სუპერ თასზე კი ინტერმა მეტოქე 3-0 გაანადგურა.

დღევანდელი დაპირისპირება იმითაც იქნება საინტერესო, რომ მილანის ახალი მთავარი მწვრთნელი, სერჟიო კონსეისაო შეეცდება იტალიაში თავისი პირველი ტიტული მოიგოს. დერბი დელა მადონინა სტარტს 23:00 საათზე აიღებს.