იფსვიჩმა ამორიმს სადებიუტო მატჩში ქულები დააკარგვინა

ინგლისის პრემიერ ლიგის მე-12 ტურში იფსვიჩმა საკუთარ მოედანზე მანჩესტერ იუნაიტედს უმასპინძლა.

სტუმართა მთავარი მწვრთნელის პოზიციაზე დებიუტი ჰქონდა რუბენ ამორიმს, რომლისთვისაც მატჩი იდეალურად დაიწყო.

წითელმა ეშმაკებმა ანგარიში მე-2 წუთზე გახსნეს. ამორიმის მანჩესტერის პირველი გოლი მარკუს რეშფორდმა გაიტანა, რომელმაც ამად დიალოს ბრწყინვალე თამაშის შემდეგ თავისი შანსი გამოიყენა.

პირველი ტაიმის ბოლოს მასპინძლებმა ანგარიშის გათანაბრება მოახერხეს. 43-ე წუთზე ომარი ჰათჩინსონმა ლამაზი დარტყმით აიღო ანდრე ონანას კარი და ანგარიში 1-1 გახადა.

მეორე ტაიმში ანგარიში აღარ შეცვლილა და რუბენ ამორიმმა სადებიუტო მატჩში მხოლოდ ქულა მოიპოვა.

12 მატჩის შემდეგ იუნაიტედს 16 ქულა აქვს და სატურნირო ცხრილში მე-12 ადგილზე იმყოფება, იფსვიჩი კი 9 ქულით მე-18 პოზიციაზეა.