კატასტროფული სტარტი - საქართველომ ერთა ლიგა მარცხით დაიწყო

ჩრდილოეთ ირლანდიამ საქართველო დრამატულ ბრძოლაში დაამარცხა.

ში ჩარლზის მიერ 99-ე წუთზე გატანილმა გოლმა სტუმრებს 1:0 გამარჯვება მოუტანა. „მწვანე-თეთრებმა“ გასვლით შეხვედრაში 6-მატჩიანი მოუგებელი სერია დაასრულეს.

შეხვედრის საწყის ეტაპზე ძირითადად ნახევარდაცვაში ხისტი და ქაოსური ბრძოლა მიმდინარეობდა.

პირველ 20 წუთში არცერთ გუნდს კარისკენ დარტყმა არ განუხორციელებია. მასპინძლებმა თანდათან ბურთის ფლობა გაზარდეს, თუმცა ჩრდილოეთ ირლანდიის კარგად ორგანიზებული დაცვისთვის პრობლემების შექმნა უჭირდათ.

მატჩში პირველი რეალური მომენტი 25-ე წუთზე შეიქმნა და მაიკლ ო’ნილის გუნდს ანგარიში უნდა გაეხსნა, თუმცა ში ჩარლზმა ახლო მანძილიდან თავური დარტყმა კარს მნიშვნელოვნად ააცილა.

შესვენებამდე საქართველოს დაწინაურების საუკეთესო შესაძლებლობა გიორგი კვერნაძეს ჰქონდა. კუთხურის შემდეგ მისი თავური დარტყმა ტრაი ჰიუმმა პრაქტიკულად კარის ხაზიდან მოიგერია.

საბოლოოდ, პირველი ტაიმი ძალიან მწირი სანახაობით დასრულდა, გუნდები ერთმანეთს წარმატებით ანეიტრალებდნენ.

ვილი სანიოლის გუნდმა მეორე ტაიმი გაცილებით აქტიურად დაიწყო და 53-ე წუთზე ანგარიშის გახსნის შესანიშნავი შანსიც მიიღო.

გიორგი ჩაკვეტაძის ბრწყინვალე პასის შემდეგ გიორგი მიქაუტაძის დაახლოებით 8 მეტრიდან შესრულებული დარტყმა პირს ჩარლზმა ბრწყინვალედ მოიგერია.

ერთ საათზე ოდნავ მეტი იყო გასული, როდესაც VAR-ის ჩარევის შემდეგ საქართველოს სასარგებლოდ პენალტი დაინიშნა.

მსაჯმა მიიჩნია, რომ დანიელ ბალარდმა ლუკა ლოჩოშვილი წესების დარღვევით შეაჩერა. თერთმეტმეტრიანის შესასრულებლად საქართველოს კაპიტანი ხვიჩა კვარაცხელია მივიდა, თუმცა მისი დარტყმა პირს ჩარლზმა მოიგერია.

მიუხედავად იმისა, რომ მეორე ტაიმში ჩრდილოეთ ირლანდიას დიდი წნეხის გაძლება უწევდა, მატჩის დასრულებამდე დაახლოებით 15 წუთით ადრე სტუმრები გოლის გატანასთან ძალიან ახლოს იყვნენ.

ში ჩარლზის ახლო მანძილიდან დარტყმას გიორგი მამარდაშვილი შესანიშნავი მოგერიებით გაუმკლავდა და ანგარიში უცვლელი დატოვა.

მეორე კართან კვლავ პირს ჩარლზს მოუწია გუნდის გადარჩენა, მან ოთარ კიტეიშვილის დაახლოებით 20 მეტრიდან ძლიერ დარტყმას ეფექტური მოგერიებით უპასუხა.

როდესაც უკვე ჩანდა, რომ შეხვედრა უგოლოდ დასრულდებოდა, ჩრდილოეთ ირლანდიამ ბოლო წუთებზე ზეწოლა გაზარდა და კომპენსირებული დროის მე-9 წუთზე ში ჩარლზმა დრამატული გამარჯვების გოლი გაიტანა.

ამ შედეგით საქართველოს 4-მატჩიანი წაუგებელი სერია დასრულდა. ვილი სანიოლის გუნდი გამარჯვების გზაზე დაბრუნებას ორშაბათს შეეცდება, როდესაც UEFA-ს ერთა ლიგაზე უკრაინას უმასპინძლებს.

ჩრდილოეთ ირლანდია კი ზედიზედ მე-2 გამარჯვების მოპოვებას იმავე საღამოს უნგრეთის წინააღმდეგ შეეცდება.