კეინი: "ახლა ჩემთვის მუნდიალის მოგების საუკეთესო შანსია“

ინგლისის ნაკრების კაპიტანი ჰარი კეინი მიიჩნევს, რომ 2026 წლის მსოფლიო ჩემპიონატი მის კარიერაში, ალბათ, საუკეთესო შანსია ტიტულის მოსაპოვებლად.

32 წლის თავდამსხმელი ტურნირს ბრწყინვალე ფორმაში ხვდება, რადგან გასულ სეზონში ბაიერნის რიგებში 61 გოლი გაიტანა და გუნდთან ერთად ბუნდესლიგისა და გერმანიის თასის გამარჯვებული გახდა.

კეინი აცნობიერებს, რომ ეს მუნდიალი შესაძლოა მისთვის ბოლო იყოს, თუმცა თავს ფიზიკურად საუკეთესო კონდიციებში გრძნობს. მისთვის მსოფლიო ჩემპიონატი კარიერის მწვერვალია და მოტივაციაც მაქსიმალურია - ინგლისმა ხომ ჯერ კიდევ 1966 წლის შემდეგ ვერცერთი დიდი ტურნირი ვერ მოიგო.

ინგლისელ კაპიტანს პრესაში ხშირად აკრიტიკებენ იმის გამო, რომ ნაკრები მეტისმეტად მასზეა დამოკიდებული, თუმცა კეინი ამას ბუნებრივ მოვლენად მიიჩნევს და აღნიშნავს, რომ ეს პასუხისმგებლობა მისთვის უცხო არ არის.

მისი თქმით, გუნდში სხვა ფეხბურთელებიც არიან, რომლებსაც გოლების გატანა შეუძლიათ და შემადგენლობაში ბევრი ისეთი მოთამაშეა, რომელმაც უკვე მოიგო საკლუბო ტიტულები, რაც ამ ტურნირზე გადამწყვეტი ფაქტორი იქნება.