კომო ნაპოლის გულშემატკივრებს საჩუქარს გაუკეთებს

საფეხბურთო კლუბ კომოს ოფიციალურმა გვერდმა განცხადება გამოაქვეყნა.

"კომო 1907 გულწრფელ მადლობას უხდის ნაპოლის და მის გულშემატკივრებს პარასკევს გამართულ მატჩში სპორტული სულისკვეთების ლამაზი გამოხატულებისთვის.

ატმოსფერო მარადონას სტადიონზე და თამაშის შემდეგ ორივე მხარის გულშემატკივართა რეაქცია შეუდარებელი იყო.

სწორედ ამის გამო კომო 1907 ლუდს უყიდის ნაპოლის ყველა გულშემატკივარს, რომელიც მე-2 წრის მატჩს დაესწრება 2025 წლის თებერვალში ჯუზეპე სინიგალიას სტადიონზე" - წერია იტალიური კლუბის განცხადებაში.

სერია ა-ს მე-7 ტურში ნაპოლიმ კომო 3-1 დაამარცხა, თუმცა სტუმართა კარგმა თამაშმა მასპინძელთა გულშემატკივრები აღფრთოვანებული დატოვა, რაც როგორც ტრიბუნებზე, ისე სოციალურ ქსელებშიც გამოხატეს. სწორედ ამას ემსახურება კომოს გადაწყვეტილება, რომ მეტოქე გუნდის ფანებს საჩუქარი გაუკეთოს.