მიუნხენის ბაიერნი გერმანიის ჩემპიონი 35-ედ გახდა.
ზეიმის ცენტრში მთავარი მწვრთნელი, ვინსენტ კომპანი და გუნდის დაუოკებელი წყურვილი აღმოჩნდა - მათ კიდევ უფრო მეტი ტიტულის მოგება სურთ.
თავიდან კომპანი ჩრდილში ყოფნას ამჯობინებდა, თუმცა კაპიტან მანუელ ნოიერის დაჟინებული თხოვნით, ის სამწვრთნელო შტაბთან ერთად გულშემატკივრების წინაშე მაინც წარდგა. როგორც კი ბელგიელმა სპეციალისტმა ტრიბუნებს მიაშურა, სტადიონმა მისი სახელი ერთხმად დაიგუგუნა. ემოციებისგან კომპანიმ ფანებს მადლობა მუშტების ჰაერში აწევით გადაუხადა, რასაც კლუბის პრეზიდენტმა, ჰერბერტ ჰაინერმა „წლის ფოტო“ უწოდა.
მოგონებები 2013 წლიდან
ბაიერნის ფანებს მწვრთნელის მიმართ ასეთი სიყვარული 2013 წლის შემდეგ არ გამოუხატავთ. მსგავსი სითბო ვერც ტომას ტუხელმა და ვერც იულიან ნაგელსმანმა ვერ დაიმსახურეს. კომპანიმ კლუბში ისეთი სიმშვიდე და მიმზიდველი ფეხბურთი დააბრუნა, რომელიც იუპ ჰაინკესის ლეგენდარულ ეპოქას მოგვაგონებს.
მიმდინარე სეზონის 47 მატჩში გუნდმა 161 გოლი გაიტანა, რაც კლუბის რეკორდია. ბუნდესლიგაში მიუნხენელთა დომინაციაზე ისიც მეტყველებს, რომ საჩემპიონო მატჩში კომპანიმ შემადგენლობის როტაციას მიმართა (8 ცვლილება მადრიდის რეალთან შეხვედრის შემდეგ) და მესამეადგილოსანი შტუტგარტი მაინც დამაჯერებლად დაამარცხა.
მიზანი - მესამე ტრებლი
ჰერბერტ ჰაინერი კომპანის ჯეკპოტს უწოდებს, თუმცა ბელგიელს ბაიერნის დიდებთან გასატოლებლად მხოლოდ ლიგის ტიტული არ ეყოფა - მას ტრებლი სჭირდება. 2020 წლის შემდეგ კლუბს ამის საუკეთესო შანსი ახლა აქვს. ოთხშაბათს ისინი გერმანიის თასის ნახევარფინალში ლევერკუზენის ბაიერს უმასპინძლებენ, შემდეგ კი ჩემპიონთა ლიგაზე პსჟ-ს დაუპირისპირდებიან.
ზეიმის დროს გულშემატკივრები ევროპის თასსა და ბერლინის ფინალზე მღეროდნენ, რითაც მიანიშნეს, რომ მხოლოდ შიდა ჩემპიონობა საკმარისი არ არის. თავად გუნდმა ზეიმი მალევე დაასრულა, არ ყოფილა ლუდის შხაპი და დიდი წვეულება. კიმიხმა აღნიშნა, რომ გუნდი სრულ კონცენტრაციას ინარჩუნებს, ჰარი კეინმა კი დაამატა, რომ კომპანი იმავე საღამოს ლევერკუზენის ბაიერის მატჩების ანალიზს აპირებდა.
