არბელოა: „მსაჯმა აშკარა უხეში შეცდომა დაუშვა"

მადრიდის რეალის მთავარმა მწვრთნელმა, ალვარო არბელოამ, ჩემპიონთა ლიგის მეოთხედფინალში ბაიერნთან მარცხის შემდეგ, ედუარდო კამავინგას მდგომარეობაზე ისაუბრა.

შეგახსენებთ, რომ ფრანგმა ნახევარმცველმა 86-ე წუთზე ჰარი კეინზე ფოლისა და ბურთის მოგერიების გამო მეორე ყვითელი ბარათი მიიღო, რის შემდეგაც მადრიდელებმა კაცნაკლულებმა ორი გოლი გაუშვეს (3:4) და ტურნირს გამოეთიშნენ.

მატჩის შემდეგ კამავინგამ გულშემატკივრებს ბოდიში მოუხადა, ვრცელდებოდა ინფორმაცია, რომ ის გასახდელში მარტო ტიროდა. არბელოამ ფეხბურთელს მხარდაჭერა გამოუცხადა:

„მას ისევე ტკივა, როგორც ყველას. მიმაჩნია, რომ ეს მსაჯის სერიოზული შეცდომა იყო - აშკარაა, მან არ იცოდა, რომ ედუარდოს ბარათი უკვე ჰქონდა. ასეთ შეხვედრებში მოთამაშეებზე უდიდესი წნეხია. კამავინგას იმიტომ ტკივა, რომ მან იცის, რამდენად მნიშვნელოვანია ჩემპიონთა ლიგა რეალისთვის.

ედუარდო ჩემი და მთელი კლუბის ნდობით სარგებლობს, მას გულშემატკივრებიც უყვართ. იმედი მაქვს, ის ჩვენთან კიდევ მრავალი წლის განმავლობაში დარჩება“, - განაცხადა არბელოამ ალავესთან მატჩისწინა პრესკონფერენციაზე.

არბელოას სიტყვების საპირისპიროდ, პრესაში აქტიურად იწერება, რომ რეალი ზაფხულში კამავინგას გაყიდვას შეეცდება.