საფრანგეთის ნაკრების მსოფლიო ჩემპიონატის ნახევარფინალური მატჩი ესპანეთის წინააღმდეგ დრამატული გამოდგა არა მხოლოდ მოედანზე, არამედ გასახდელშიც, სადაც გუნდის შიდა სამზარეულოს შესახებ საინტერესო დეტალები გახდა ცნობილი.
მატჩის შესვენებისას, როდესაც ლურჯები უკვე მარცხდებოდნენ ესპანეთთან მიკელ ოიარზაბალის მიერ შესრულებული პენალტის შედეგად (22-ე წუთი), გუნდის თავდამსხმელმა უსმან დემბელემ სიტყვით გამოსვლა გადაწყვიტა.
2025 წლის ოქროს ბურთის მფლობელმა საკუთარი გუნდის ტაქტიკა, კერძოდ კი პრესინგის მეთოდი გააკრიტიკა. დემბელეს აზრით, საფრანგეთის ნაკრების პრესინგი ნაკლებად კოორდინირებული იყო, რამაც ესპანელებს უპირატესობის მოპოვებაში ხელი შეუწყო.
ფეხბურთელის ამ ინიციატივას გუნდში ერთმნიშვნელოვანი მხარდაჭერა არ მოჰყოლია. პირიქით, დემბელეს საუბარმა მისი თანაგუნდელების ნაწილის გაღიზიანება გამოიწვია. წყაროების ცნობით, გუნდის წევრებს დარჩათ შთაბეჭდილება, რომ დემბელე მხოლოდ მაშინ გამოხატავდა აგრესიას ან უკმაყოფილებას, როდესაც ის თავად იმყოფებოდა სირთულეების წინაშე.
საფრანგეთის ნაკრებმა მეორე ტაიმშიც ვერ შეძლო თამაშის შემობრუნება, ხოლო 58-ე წუთზე პედრო პორომ მეორე გოლიც გაიტანა, რამაც საბოლოოდ გააქრო ფრანგების ფინალში გასვლის იმედი.
მატჩის შემდეგ გამოქვეყნებული ინფორმაციით, საფრანგეთის ნაკრების მთავარმა მწვრთნელმა, დიდიე დეშამმა, გადამწყვეტ მატჩებში გუნდის გაძღოლისას თავი უძლურად იგრძნო, რაც გუნდის წარუმატებლობის ერთ-ერთ მთავარ ფაქტორად ფასდება.
ამ მარცხის შემდეგ, საფრანგეთი შაბათს საღამოს 23:00 საათზე ინგლისის ნაკრებს დაუპირისპირდება მესამე ადგილისთვის ბრძოლაში, ხოლო ესპანეთი კვირას ფინალში არგენტინის წინააღმდეგ გააგრძელებს ტიტულისთვის ბრძოლას.
