მსოფლიო ჩემპიონატის ფინალში, რომელიც არგენტინისა და ესპანეთის ნაკრებებს შორის ნიუ-ჯერსის მეტლაიფ სთედიუმზე გაიმართება, შესვენება ჩვეულებრივზე ხანგრძლივი, 25-30 წუთი იქნება.
ამის მიზეზი ფიფას გეგმაა, რომელიც შესვენების დროს 11-წუთიან გრანდიოზულ შოუს ითვალისწინებს, რაც სპორტული რეგულაციებით დადგენილ 15-წუთიან ლიმიტს მნიშვნელოვნად აჭარბებს.
ფიზიოლოგიის ექსპერტები აფრთხილებენ ორგანიზატორებს, რომ შესვენების ასეთი გახანგრძლივება ფეხბურთელებისთვის ტრავმების რისკს ზრდის და მათ სათამაშო ფორმაზე უარყოფითად აისახება.
მანჩესტერ მეტროპოლიტენის უნივერსიტეტის პროფესორი, დოქტორი ლიამ ჰარპერი განმარტავს, რომ 15-წუთიანი შესვენება ისედაც საკმარისია კუნთების ტემპერატურის საგრძნობლად დასაწევად, ხოლო 30-წუთიანი პაუზა ამ ეფექტს გაამძაფრებს. კუნთების ტემპერატურის დაცემა კი ამცირებს ძალის გამომუშავებას და აუარესებს ფიზიკურ მაჩვენებლებს.
ექსპერტის თქმით, მიუხედავად იმისა, რომ დამატებითი დრო ფეხბურთელებს ენერგიის აღსადგენად და საკვებად შეიძლება გამოადგეთ, ეს რისკებს მაინც ვერ ანეიტრალებს.
პრობლემის შესამსუბუქებლად, დოქტორი ჰარპერი ფიფას ურჩევს, მოთამაშეებს მეორე ტაიმის დაწყებამდე მისცენ 2-4 წუთი ხელახალი გახურებისთვის, ხოლო კუნთების მოქნილობის შესანარჩუნებლად გამოიყენონ მასაჟის იარაღები.
