2026 წლის მსოფლიო ჩემპიონატის დაწყებამდე მხოლოდ 63 დღე რჩება, თუმცა ფიფა სერიოზული კრიტიკის ქარცეცხლში გაეხვა.
მიზეზი ბილეთების კატეგორიებში შეტანილი მოულოდნელი ცვლილებებია, რასაც გულშემატკივრები თაღლითობასა და ფანების გაძარცვის მცდელობას უწოდებენ.
რამ გამოიწვია გულშემატკივრების რისხვა?
თავდაპირველად ფიფა ბილეთებს ოთხ კატეგორიად ყიდდა. პირველი კატეგორია ყველაზე პრესტიჟულად და ძვირადღირებულად ითვლებოდა, რაც გულშემატკივრებს სტადიონის ქვედა იარუსზე საუკეთესო ადგილების (მათ შორის წინა რიგების) ყიდვის იმედს აძლევდა. ფანებმა ამ ბილეთებში ათასობით დოლარი უკვე გადაიხადეს.
თუმცა, მას შემდეგ, რაც ბილეთები გადანაწილდა, ბევრი მყიდველი იმედგაცრუებული დარჩა. მათ ადგილები კუთხეებში ან კარების უკან შეხვდათ. სკანდალი კი მას შემდეგ გამწვავდა, რაც ფიფა-მ მოულოდნელად ახალი, კიდევ უფრო ძვირი კატეგორიები დაამატა: Front Category 1 და Front Category 2.
ორმაგი ფასი იმავე ადგილებში
The Athletic-ის ინფორმაციით, წინა რიგების საუკეთესო ადგილები, რომლებიც ადრე პირველ კატეგორიაში იგულისხმებოდა, ახლა ცალკეა გამოყოფილი და მათი ფასი ზოგჯერ გაორმაგებულია. მაგალითად, ალჟირი - ავსტრიის მატჩზე კანზას-სიტიში, მეორე რიგის ადგილები 900 დოლარი ღირს ანუ ორჯერ მეტი, ვიდრე სტანდარტული პირველი კატეგორიის ბილეთი.
„FIFA-ს გულშემატკივრების მიმართ კეთილი ნება არ გააჩნია. მათი მთავარი მიზანი მოგების მაქსიმიზაციაა“, - აცხადებს ერთ-ერთი დაზარალებული ფანი. სოციალურ ქსელებში კი მომხმარებლები პირდაპირ კორუფციაზე საუბრობენ: „ეს არის მასშტაბური აფიორა; მე მომატყუეს“.
ჯერჯერობით FIFA-ს არ განუმარტავს, რატომ შეიქმნა ახალი კატეგორიები ასე გვიან და რატომ არ იყო თავიდანვე ცნობილი, რომ პირველი კატეგორიის ბილეთის მფლობელებს წინა რიგებში მოხვედრის შანსი ფაქტობრივად არ ჰქონდათ.
