მოჰამედ სალაჰმა ლივერპულის გულშემატკივრებს გულწრფელი თხოვნით მიმართა: როდესაც კლუბის ყოფილი კაპიტანი, ჯორდან ჰენდერსონი ენფილდზე დაბრუნდება, მას ისეთი გამოსამშვიდობებელი საღამო მოუწყონ, როგორიც დაიმსახურა.
ეგვიპტელი ფორვარდის თქმით, 2023 წელს ჰენდერსონის მოულოდნელმა წასვლამ კლუბის ლეგენდას შესაძლებლობა მოუსპო, გულშემატკივრებთან სათანადოდ დამშვიდობებოდა.
ხანგრძლივი მოლოდინის შემდეგ - დაბრუნება
ჰენდერსონი ენფილდზე 2023 წლის ზაფხულში წასვლის შემდეგ პირველად გამოჩნდება – ის ბრენტფორდის შემადგენლობაში ლივერპულის წინააღმდეგ სეზონის ბოლო ტურში ითამაშებს. ვინაიდან მისმა ტრანსფერმა საუდის არაბეთში ელვისებური სისწრაფით ჩაიარა, მან გულშემატკივრებისგან სათანადო დაფასება ვერ მიიღო.
სალაჰმა, რომელიც სტივენ ჯერარდს ესაუბრებოდა, ჰენდერსონის როლზე ხაზგასმით ისაუბრა:
მას არ მიუღია ის გამოსამშვიდობებელი საღამო, რომელიც დაიმსახურა, რადგან მაშინვე წავიდა. ქალაქში ყველამ იცის, რას ნიშნავდა ეს ჰენდოსთვის – ის კლუბის კაპიტანი 12 წლის განმავლობაში იყო. მეც, ვირჯილმაც და სხვებმაც, ყველაზე მეტად სწორედ მან გააკეთა ბევრი. არ ვიცი, კლუბი როგორ მოიქცევა ან გულშემატკივრები რას დაგეგმავენ, მაგრამ ნამდვილად მინდა, რომ მისთვის რაღაც განსაკუთრებული გააკეთონ. ის კლუბის ერთ-ერთი საუკეთესო მოთამაშე იყო და მის გარეშე გასახდელში იმ წარმატებებს ვერ მივაღწევდით, რაც გვქონდა
წასვლის ტკივილი
თავად ჰენდერსონმა ადრე აღიარა, რომ ლივერპულიდან წასვლა მისთვის ურთიერთობის გაწყვეტას ჰგავდა.
ლივერპულიდან წასვლა უზარმაზარი და ძალიან მძიმე ნაბიჯი იყო, რადგან ეს ჩემი ცხოვრების ნაწილი იყო იმდენად დიდხანს. წასვლის შემდეგ გარკვეული პერიოდი ვიტანჯებოდი. მატჩებს ვერ ვუყურებდი, ლივერპულის თამაშებს მით უმეტეს. თავს ისე ვგრძნობდი, თითქოს ურთიერთობა დავასრულე – რთული იყო
ლივერპულის ახალი ეტაპი
ბრენტფორდთან მატჩი ლივერპულისთვის ემოციური ეტაპის დასასრული იქნება. ჯორდან ჰენდერსონის დაბრუნების გარდა, სეზონის ბოლოს ისეთი ფეხბურთელების წასვლა, როგორებიც სალაჰი და ენდრიუ რობერტსონი არიან, კლუბისთვის გარდამავალ ფაზას ნიშნავს. კლუბს მოუწევს, ერთი მხრივ, ლეგენდების ღირსეულად გაციება და მეორე მხრივ, მომავლის გუნდის მშენებლობის დაწყება.
