„მეფე გვირგვინის მოლოდინში“ - კილიან მბაპე Vanity Fair-ის გარეკანზეა
მსოფლიო ფეხბურთის მთავარი ფიგურა, კილიან მბაპე, 2026 წლის მუნდიალის წინ Vanity Fair-ის ახალი ნომრის სახე გახდა. 27 წლის ფრანგი ვარსკვლავი ენი ლეიბოვიცის ობიექტივში მოხვდა და გულახდილად ისაუბრა იმ კოლოსალურ წნეხზე, რომელსაც ის „მსოფლიოს მწვერვალზე“ ყოფნისას განიცდის.
მოედანზე: გოლების მანქანა და მადრიდული წნეხი
მბაპე მადრიდის რეალში თავის მეორე სეზონს ასრულებს. მიუხედავად იმისა, რომ მისი სტატისტიკა ფენომენალურია, 41 გოლი 41 მატჩში, კრიტიკოსები მას მაინც არ ინდობენ. „ანტიაგო ბერნაბეუზე მას ხშირად ადანაშაულებენ ზედმეტ ინდივიდუალიზმში, რასაც ფეხბურთელი სიმშვიდით პასუხობს:
რთულია იყო ჩვენს სიტუაციაში, როცა ყველა სასწაულს ელის. მაგრამ სასწაულები მხოლოდ მოედანზე ხდება, ჩვენ არ გვჭირდება მატჩის თამაში მის დაწყებამდე
მოქალაქე მბაპე: „ფეხბურთელი არ უნდა გაჩუმდეს“
მბაპეს პორტრეტი წარმოუდგენელია მისი სამოქალაქო აქტივობის გარეშე. ის არ არის სპორტსმენი, რომელიც მხოლოდ ბურთს დასდევს; ის საფრანგეთის ხმაა, რომელიც არ ერიდება რასიზმზე, ემიგრაციასა და ქვეყნის პოლიტიკურ ბედზე საუბარს.
ჩვენ მართლა ვცდილობთ ვებრძოლოთ იდეას, თითქოს ფეხბურთელმა მხოლოდ უნდა ითამაშოს და გაჩუმდეს. შენ შეიძლება იყო საერთაშორისო ვარსკვლავი, მაგრამ უპირველეს ყოვლისა, შენ ხარ მოქალაქე. ჩვენ არ ვართ მოწყვეტილი სამყაროს ან იმას, რაც ჩვენს ქვეყანაში ხდება
ფრანგულ იდენტობასა და საზოგადოებრივ კრიტიკაზე საუბრისას მბაპემ გულწრფელი შეფასება გააკეთა:
ფრანგს უყვარს წუწუნი. ფრანგს უყვარს, როცა უკმაყოფილოა. ჩვენ უბრალოდ ფრანგები ვართ! ფრანგი ყველაზე ბედნიერი მაშინ არის, როცა ბედნიერი არ არის... ჩვენ ყველაფერს ვაკრიტიკებთ და მეც ასეთი ვარ!
დიდების ტვირთი: ცხოვრება საზოგადოების მეთვალყურეობის ქვეშ
დღეს მბაპე ისეთი მასშტაბის ფიგურაა, რომ მას არ შეუძლია საზოგადოებრივ ადგილებში თავისუფლად გამოჩენა. მადრიდში ის განსაკუთრებით დაცულ ვილაში ცხოვრობს და აღიარებს, რომ საკუთარი თავი აღარ ეკუთვნის.
რა თქმა უნდა, რთულია, როცა გრძნობ, რომ საკუთარ თავს აღარ ეკუთვნი და ყველას საკუთრება ხარ. მაგრამ ეს ცხოვრება ჩვენ ავირჩიეთ. ცოტა უმადურობა იქნებოდა წუწუნი, როცა მილიონობით ადამიანი გამოხატავს შენს მიმართ სიყვარულს და აღიარებას
2026 წლის მუნდიალი: რეკორდის მოლოდინში
ჩრდილოეთ ამერიკაში მბაპე მთავარი მისიით მიდის: დააბრუნოს მსოფლიო თასი საფრანგეთში და დაამხოს მიროსლავ კლოზეს აბსოლუტური რეკორდი.
საკუთარი ქვეყნის წარდგენაზე დიდი არაფერი არსებობს. უკან ვერ დაბრუნდები. ჩვენ უნდა ავიღოთ 2022 წლის იმედგაცრუება და მოტივაციად ვაქციოთ, რათა მართლა შევცვალოთ ისტორიის კურსი და მოვიპოვოთ მესამე ვარსკვლავი
ბავშვობის კერპი და ზინედინ ზიდანი
ინტერვიუში მბაპემ სითბოთი გაიხსენა თავისი ბავშვობა და ლეგენდარული ზინედინ ზიდანი.
ბავშვობაში ზიდანის ვარცხნილობა ვთხოვე სტილისტს... ეს სასაცილოა, მაგრამ ბავშვურ უმანკოებას აჩვენებს. მაშინ ვერ ვხვდებოდი, რომ ასეთ ცნობილ და ძლიერ ადამიანს შეეძლო თმა თავისი ნებით არ დაეკარგა
კილიან მბაპე 2026 წლის მსოფლიო ჩემპიონატს ხვდება როგორც ჩამოყალიბებული ლიდერი. ის აღარ არის მხოლოდ „მომავლის იმედი“, ის აწმყოს მმართველია, რომელიც მზად არის ყველა კრიტიკას მოედანზე გატანილი გოლებითა და მოპოვებული ტიტულებით უპასუხოს.
