ევრობასკეტის ჯგუფური ეტაპის მეორე ტურში საქართველოს ნაკრები იტალიას დაუპირისპირდება.
ესპანეთთან გამარჯვებით ფრთებშესხმული ბიჭები ისტორიულად ჩვენთვის უხერხულ მეტოქეს შეხვდებიან - აქამდე, იტალიის ნაკრებს 8-ჯერ შევხვდით და ჯერჯერობით, გამარჯვება არ მოგვიპოვებია.
თუმცა, უარყოფითი სტატისტიკა გვქონდა ესპანეთთან მატჩის წინაც (1:3), რამაც ჩვენს ნაკრებს ხმაურიანი გამარჯვების მოპოვებაში ხელი ვერ შეუშალა.
იტალიის ნაკრებთან ბოლოსწინა შეხვედრა განსაკუთრებით საინტერესო და გულდასაწყვეტი გამოვიდა, როცა მსოფლიოს საკვალიფიკაციო ეტაპზე მხოლოდ ერთი ქულით დავმარცხდით (84-85). სხვათაშორის, ეს იტალიელებთან ერთადერთი ერთქულიანი მარცხი არ არის - ანალოგიური რამ მოხდა 2015 წლის ამხანაგურ შეხვედრაშიც, როცა 90:91 მოგვიგეს.
დღევანდელ შეხვედრაში იტალიელები განსაკუთრებული მოტივაციით გავლენ პარკეტზე, რადგან ევრობასკეტი მათთვის არასახარბიელოდ დაიწყო - გუნდი იანის ანტეტოკუნმპოს ზეწოლის ქვეშ გატყდა და საბერძნეთთან 66:75 დამარცხდა.
იტალიის ნაკრებთან უკანასკნელი ჩვენი შეხვედრა 2024 წლის ივნისით თარიღდება, როცა ამხანაგურ მატჩში 68:79 მოგვიგეს.
ასეა თუ ისე, ამ ევრობასკეტზე ერთი დიდი სენსაცია უკვე მოვახდინეთ, როცა მოქმედი ევროპის ჩემპიონი უშანსოდ, 83:69 დავამარცხეთ. ამიტომ, ზედიზედ მეორე ხმაურიანი გამარჯვების მოპოვება ბიჭებს ნამდვილად შეუძლიათ.
შეხვედრა დღეს, 30 აგვისტოს, თბილისის დროით 16:00 საათზე, საზოგადოებრივ მაუწყებელზე დაიწყება.
