ლეგენდარული მანუელ ნოიერი გერმანიის ნაკრების მაისურს კვლავ მოირგებს.
მიუხედავად იმისა, რომ მიუნხენ ბაიერნის 40 წლის ვეტერანმა ეროვნული გუნდი 2024 წელს დატოვა, ნაგელსმანმა მისი დაყოლიება შეძლო. Sky Sport-ის ინფორმაციით, ნოიერმა მწვრთნელთან და ფედერაციის დირექტორ რუდი ფიოლერთან შეთანხმებას მიაღწია და 2026 წლის მსოფლიო ჩემპიონატზე გუნდის ძირითადი მეკარე იქნება. ნაგელსმანი მიიჩნევს, რომ ნოიერის გამოცდილება და გამარჯვებულის მენტალიტეტი ნაკრებისთვის უმნიშვნელოვანესია.
ეს გადაწყვეტილება ნამდვილი შოკი და მძიმე დარტყმა აღმოჩნდა ოლივერ ბაუმანისთვის. ჰოფენჰაიმის 34 წლის გოლკიპერი საკვალიფიკაციო ეტაპზე გუნდის პირველი ნომერი იყო და დარწმუნებული იყო, რომ მუნდიალზეც ის ითამაშებდა. ბაუმანმა აღნიშნა: „მომზადებას და მსოფლიო ჩემპიონატს დიდი თავდაჯერებით ვხვდები. მწვრთნელმა ნდობა გამომიცხადა. იულიანთან პირადი საუბარი მქონდა და ჩემი ინფორმაცია მაქვს.“
თავად ნოიერი საჯაროდ ჯერჯერობით ფრთხილობს. კიოლნთან მოგებული მატჩის (5:1) შემდეგ, სადაც მან წვივის მცირე ტრავმა მიიღო, ბაიერნის კაპიტანმა ნაკრებზე საუბარს თავი აარიდა:
„ჩემთვის ეს თემა დღეს აქტუალური არ არის. დღეს ჩემპიონობას ვზეიმობთ, მომავალ კვირას კი თასზე უმნიშვნელოვანესი მატჩი გველის. ნაგელსმანთან კავშირი მთელი წლის განმავლობაში მქონდა, მაგრამ იერარქიაზე კითხვები მე კი არა, თავად მწვრთნელს უნდა დაუსვათ.“
