მოულოდნელი სტუმარი სანტიაგო ბერნაბეუზე

მადრიდის რეალისა და მალაგას მატჩის მიმდინარეობისას სანტიაგო ბერნაბეუზე მოულოდნელი სტუმარი გამოჩნდა.

30 წლის დანი სებალიოსი, რომლის მომავალიც ჯერ კიდევ გაურკვეველია, ყოფილი თანაგუნდელების თამაშს VIP ლოჟიდან ადევნებდა თვალს. კამერებმა ესპანელი ნახევარმცველი კილიან მბაპეს გოლის შემდეგ დააფიქსირეს, როცა მადრიდელები უკვე დამაჯერებლად, 4:0-ს იგებდნენ.

ბეტისში დაბრუნების მოლოდინი

გამოცემა AS-ის ინფორმაციით, სატრანსფერო ფანჯრის დახურვამდე 24 საათზე ნაკლები რჩება, სებალიოსის მთავარი პრიორიტეტი კი მშობლიურ რეალ ბეტისში დაბრუნებაა. ფეხბურთელმა ანდალუსიური კლუბი 2017 წელს სწორედ რეალში გადასასვლელად დატოვა.

ამჟამად იგი მადრიდში ინდივიდუალურად ვარჯიშობს და კლუბებს შორის შეთანხმების დასრულებას ელოდება. მიუხედავად იმისა, რომ დრო სწრაფად იწურება, ბეტისის ხელმძღვანელობის ბოლოდროინდელი ნაბიჯები მიანიშნებს, რომ ესპანელის დაბრუნება ახლა ისე ახლოსაა, როგორც არასდროს.

უარი აიაქსს და მთავარი დაბრკოლება

აღსანიშნავია, რომ ზაფხულის სატრანსფერო ფანჯრის დასაწყისში სებალიოსმა ამსტერდამის აიაქსისგან ფინანსურად და სპორტული კუთხით საკმაოდ მიმზიდველი შეთავაზება მიიღო, თუმცა უარი განაცხადა, რადგან საკუთარ მომავალს მხოლოდ ესპანეთს უკავშირებს. ტრანსფერის განხორციელების მთავარ დაბრკოლებად ამ ეტაპზე ანდალუსიური კლუბის მხრიდან ფეხბურთელების დარეგისტრირების პრობლემა და სახელფასო ლიმიტი სახელდება. სწორედ ამ საკითხის მოგვარებაზეა დამოკიდებული, ჩაიცვამს თუ არა სებალიოსი კვლავ მწვანე-თეთრ მაისურს.