ნეიმარი ბოლო დღეებში კვლავ სკანდალების ეპიცენტრში მოექცა.
ვილა ბელმიროზე თამაში, სტადიონზე, სადაც ის გაიზარდა და ვარსკვლავად იქცა, ფეხბურთელისთვის არაკომფორტული აღმოჩნდა, რადგან სანტოსის შედეგები გულშემატკივრების მოლოდინს ვერ ამართლებს.
ნეიმარის პასუხი სტვენას და მორიგი დაპირისპირება
რამდენიმე დღის წინ ის ერთ-ერთ გულშემატკივარს სიტყვიერად დაუპირისპირდა, კვირას კი, ფლუმინენსესთან მარცხის შემდეგ, მოედანი გულშემატკივრების მხრიდან ძლიერი სტვენის ფონზე დატოვა. ბრაზილიელმა ამას ჟესტით უპასუხა, რომელიც შეუმჩნეველი არ დარჩენილა: გასახდელისკენ მიმავალმა მან ყურებზე ხელები აიფარა.
ამ კადრებმა სოციალური ქსელები მალევე მოიცვა, რასაც თავად ფეხბურთელის რეაქციაც მოჰყვა. Twitter-ის პირად გვერდზე ნეიმარმა დაწერა:
„დადგა დღე, როცა ყურის მოფხანისთვის თავის მართლება მიწევს! გულწრფელად ვამბობ, ხალხი ძალიან შორს მიდის და ზღვარს გადადის.. ძალიან სამწუხაროა ამასთან გამკლავება. ამას ვერცერთი ადამიანი ვერ გაუძლებს“.
თუმცა, ბევრმა ეს განმარტება პასუხისმგებლობისგან თავის არიდების მცდელობად აღიქვა. ვილა ბელმიროზე პირველი სტვენა მაშინ გაისმა, როცა ნეიმარმა ე.წ. ცისარტყელას (rainbow flick) შესრულება სცადა იმ მომენტში, როცა სანტოსი ანგარიშის გათანაბრებას ცდილობდა. ფინალური სასტვენის შემდეგ კი უკმაყოფილება კიდევ უფრო გამწვავდა. აშკარად გაღიზიანებულმა ნეიმარმა მოედანი პირველმა დატოვა, რამაც ფანები კიდევ უფრო გაააბრაზა.
მოგვიანებით ფეხბურთელმა TNT Sports-ის პოსტს, სადაც აღნიშნული მომენტის ვიდეო იყო გამოქვეყნებული, კიდევ უფრო მკაცრად უპასუხა:
„ყურებზე ხელაფარებული წავედი, ჯანდაბას! ყურის მოფხანაც აღარ შემიძლია? ჯანდაბამდე გზა გქონიათ თქვენც და თქვენს ნაგავ ადმინსაც!“
