ნიკო პასმა ინტერში შესაძლო ტრანსფერი უარყო და რეალ მადრიდში დაბრუნების პერსპექტივაზეც ისაუბრა. არგენტინელმა ხაზგასმით აღნიშნა, რომ ახლა მთლიანად კომოზეა კონცენტრირებული, რომელიც სან სიროზე ისტორიული თასის მატჩისთვის ემზადება.
პასმა განაცხადა:
ინტერთან არანაირი კონტაქტი არ ყოფილა. რეალში დაბრუნება? ახლა ამაზე არ ვფიქრობ. 100%-ით კომოზე ვარ ფოკუსირებული. კარგი სეზონი გვაქვს, სიმართლე გითხრათ, ასეთ წარმატებას არც ველოდით. მინდა მაქსიმუმი გავიღო, მომავალში კი ვნახოთ, რა მოხდება.
რეალ მადრიდი თავისი აკადემიის აღზრდილის პროგრესს ყურადღებით აკვირდება. ვრცელდება ინფორმაცია, რომ ესპანურ კლუბს არგენტინელის გამოსყიდვის უფლება აქვს შენარჩუნებული და მისი ფორმიდან გამომდინარე, ზაფხულში მადრიდში დაბრუნება სავსებით რეალურია.
ახალგაზრდა ნახევარმცველისთვის სესკ ფაბრეგასის გავლენა უმნიშვნელოვანესი აღმოჩნდა. არსენალისა და ბარსელონას ყოფილმა ვარსკვლავმა კომოში შემტევი სტილი დანერგა, რამაც პასს ცენტრალურ როლში გაბრწყინების საშუალება მისცა. მწვრთნელის გავლენაზე საუბრისას პასმა აღნიშნა:
ფაბრეგასი ყველაზე მნიშვნელოვანი ფაქტორი იყო. მას ჩვენი სჯერა. ის ახალგაზრდა მწვრთნელია, რომელიც ფეხბურთით ცხოვრობს და მაძლევს უფლებას ვითამაშო ისე, როგორც მე მინდა. ეს ჩემთვის გადამწყვეტია.
