ოფიციალურად: რომამ იურიჩი გაათავისუფლა

რომას ოფიციალური განცხადებით, ივან იურიჩი გუნდის მთავარი მწვრთნელი აღარ იქნება.

იტალიის სერია ა-ს მე-12 ტურში დედაქალაქურმა გუნდმა ბოლონიასთან სტადიო ოლიმპიკოზე 2-3 წააგო, ეს მარცხი კი იურიჩისთვის საბედისწერო აღმოჩნდა.

რომას ჩემპიონატში ჩატარებული 12 ტურის შემდეგ 13 ქულა აქვს და სატურნირო ცხრილში მე-12 ადგილზეა. გუნდი სერია ა-ს ბოლო 5-დან 4 მატჩში დამარცხდა.

იურიჩი რომაში სექტემბერში დაინიშნა, როცა მან დანიელე დე როსი ჩაანაცვლა და გუნდს სულ რაღაც 12 მატჩში უთავკაცა. რომაელებმა ამ სეზონში უკვე მე-2 მწვრთნელი გაათავისუფლეს.

იტალიურ პრესაში გავრცელებული ინფორმაციით, რომაული კლუბი მომავალ მწვრთნელად რობერტო მანჩინის განიხილავს.