პეპ გვარდიოლას ულტიმატუმი: სიტიში დარჩენის საკითხი მალე გადაწყდება

მანჩესტერ სიტის მთავარი მწვრთნელი, პეპ გვარდიოლა, კლუბში საკუთარ მომავალზე ფიქრს სეზონის დასრულებამდე არ აპირებს.

მიუხედავად იმისა, რომ 55 წლის სპეციალისტს მოქმედი კონტრაქტით კიდევ ერთი წელი აკავშირებს გუნდთან, საბოლოო გადაწყვეტილებას მაისში, ყველა ტურნირის ფინიშის შემდეგ მიიღებს.

საკუთარი თავის შეფასება და კლუბის ნდობა

გვარდიოლას სურს, ჯერ სეზონის შედეგები შეაჯამოს, დააკვირდეს გუნდის პროგრესს და საკუთარ მოტივაციას. ესპანელი ყოველთვის ასე იქცეოდა, ბარსელონასა და ბაიერნში მუშაობის დროსაც ის გადაწყვეტილებებს მხოლოდ სეზონის ბოლოს იღებდა.

მანჩესტერ სიტის ხელმძღვანელობა მშვიდადაა. კლუბის მენეჯერებს და პეპს შორის იდეალური ურთიერთობაა და ხელმძღვანელობაში მიიჩნევენ, რომ გვარდიოლამ მოიპოვა უფლება, მომავალი ყოველგვარი წნეხის გარეშე, საკუთარ ვადებში განსაზღვროს.

ბრძოლა ტიტულებისთვის და გადამწყვეტი მაისი

სანამ პეპის მომავალზე სპეკულაციები გრძელდება, მანჩესტერ სიტი ტიტულებისთვის ბრძოლას აგრძელებს. გუნდმა უკვე მოიგო ინგლისის ლიგის თასი, სადაც ფინალში არსენალი დაამარცხა. ახლა ქალაქელები პრემიერ ლიგის საჩემპიონო რბოლაში არიან ჩართულები და ლონდონელებთან სხვაობის შემცირებას ცდილობენ.

გარდა ამისა, მანჩესტერ სიტი ინგლისის ასოციაციის თასის მეოთხედფინალშია, სადაც ეტიჰადზე ლივერპულს უმასპინძლებს. სწორედ ამ ტურნირების ფინალური აკორდი და 24 მაისს ასტონ ვილასთან გასამართი მატჩი იქნება ის წერტილი, რის შემდეგაც პეპი საკუთარ არჩევანს ყველას გაგვიმხელს.

ვინ შეცვლის პეპს? - „გეგმა ბ“ უკვე არსებობს

გვარდიოლა მანჩესტერულ კლუბში უკვე თითქმის ათი წელია მუშაობს და ეს პერიოდი სიტის ისტორიაში ყველაზე წარმატებულია. კლუბის სპორტული დირექტორი, უგო ვიანა უკვე მუშაობს სათადარიგო გეგმაზე იმ შემთხვევისთვის, თუ ესპანელი წასვლას გადაწყვეტს.

კანდიდატებს შორის რამდენიმე საინტერესო სახელი ფიგურირებს:

ენცო მარესკა - გვარდიოლას ყოფილი ასისტენტი;

ვინსენტ კომპანი - გუნდის ლეგენდარული კაპიტანი;

ჩაბი ალონსო - მწვრთნელი, რომელიც ევროპაში ერთ-ერთ ყველაზე პერსპექტიულად ითვლება.