რონალდუს შესაძლო ტრავმა მსოფლიო ჩემპიონატის წინ

ალ-ნასრისთვის“ ბოლო გამარჯვება მძიმე აღმოჩნდა.

მართალია, ჟორჟე ჟეზუშის გუნდმა „ალ-ფეიჰასთან“ თამაში შემოატრიალა, 3:1 მოიგო და ჩემპიონატში ლიდერობა დაიბრუნა, მაგრამ ახლა მთელი ყურადღება კაპიტნის, კრიშტიანუ რონალდუს ჯანმრთელობაზეა გადატანილი.

41 წლის ასაკში CR7 ფანტასტიკურ ფორმაშია, მაგრამ ამ ასაკში ნებისმიერი ტრავმა ორმაგად სარისკოა. არსებობს რეალური საფრთხე, რომ კრიშტიანუმ არა მხოლოდ კლუბს დააკლდეს ტიტულისთვის ბრძოლაში, არამედ კითხვის ნიშნის ქვეშ დადგეს მისი მონაწილეობა პორტუგალიის ნაკრებშიც, წინ კი მსოფლიო ჩემპიონატია.

რა მოხდა მოედანზე?

ყველაფერი მე-80 წუთიდან დაიძაბა. მას შემდეგ, რაც „ალ-ნასრი“ წინ გავიდა, რონალდუმ დისკომფორტი იგრძნო და მოედნის დატოვება მოუწია. სათადარიგო სკამზე კი ბარძაყის კუნთზე ყინულებს იდებდა.

მატჩის შემდეგ ჟორჟე ჟეზუშმა სიტუაციის დამშვიდება სცადა:

რონალდუმ კუნთების გადაღლა იგრძნო. სამედიცინო შტაბი სასწრაფოდ ჩაატარებს კვლევებს, რომ გავიგოთ, რეალურად რა მდგომარეობაა.

პრობლემები მეორდება

ეს არ არის პირველი შემთხვევა, როცა კრიშტიანუს თამაშის ნაადრევად დასრულება უწევს. მსგავსი რამ კვირის შუაში, „ალ-ნაჯმასთან“ მატჩშიც მოხდა. ახლა, როცა საუდის არაბეთის ჩემპიონობისთვის ბრძოლა პიკს აღწევს, გუნდში ყველა იმედოვნებს, რომ ტესტები სერიოზულ დაზიანებას გამორიცხავს.

თუმცა, მთავარი მაინც მსოფლიო ჩემპიონატია. ეს რონალდუსთვის ბოლო მუნდიალი იქნება და ყველაფერს გააკეთებს, რომ კარიერის მთავარ ტურნირს მწყობრში შეხვდეს.