სოსიედადის მწვრთნელი: "რეალი დიდი კლუბია და მსაჯების დახმარება არ უნდა სჭირდებოდეს"

სოსიედადის მწვრთნელმა, იმანოლ ალგუასილმა აღნიშნა, რომ რეალმა მისი გუნდის ბარიერი კოპა დელ რეიზე მსაჯების დახმარებით გადალახა.

VIDEO: უხვგოლიანი დრამა ბერნაბეუზე - რეალი სოსიედადთან გამოვარდნას გადაურჩა და თასის ფინალში გავიდა!

ალგუასილის თქმით, მატჩის მესამე გოლი, რომელიც ორელიან ჩუამენიმ გაიტანა, არ უნდა შემდგარიყო, რადგან კუთხურის დანიშვნამდე კილიან მბაპე თამაშგარეში იყო.

„თამაშგარე იყო და მსაჯს უნდა დაესტვინა - სჯობს, ამაზე არ ვილაპარაკო, რადგან არ დაუსტვინა და მორჩა.

თუმცა, რეალმა ჩვენ იმის დახმარებით გაგვაგდო, ვინც წესით ნეიტრალური უნდა იყოს. რეალი დიდი კლუბია და დახმარება არ უნდა სჭირდებოდეს. დარწმუნებული ვარ, ეს გოლი არ ჩაითვლებოდა, სხვაგან რომ მომხდარიყო მსგავსი რამ.

ასეთი რაღაცები დამატებით იმპულსს უნდა გვაძლევდეს, რომელიც ხშირად გვაკლია ხოლმე. მე-6 ტურიდან დაწყებული ძალიან კარგ სეზონს ვატარებთ. გუნდს ყურები არ ჩამოუყრია და ბრძოლას აგრძელებდა, რითაც ვამაყობ.

ისტორიული საღამოები მოგონებაში რჩება, თუ ფინალამდე მიხვალ, მაგრამ ეს მატჩიც ჩემს გულში დარჩება." - აღნიშნა ბასკმა სპეციალისტმა.