ლონდონში სტარტი აიღო უიმბლდონმა. პირველ რაუნდში რეიტინგის მე-9 ნომერი, დანილ მედვედევი 64-ე ნომერ, ფრანგ ბენჟამინ ბონზის დაუპირისპირდა.
შეხვედრა 4 სეტში ფრანგის გამარჯვებით დასრულდა (7-6, 3-6, 7-6, 6-2) და რუსი უიმბლდონს პირველივე რაუნდში დაემშვიდობა.
წელს მედვედევი სამივე გრანდ სლემს ადრეულ ეტაპზე გამოეთიშა. ავსტრალიაში ის მეორე რაუნდში დამარცხდა, როლან გაროსზე კი უიმბლდონის მსგავსად პირველივე თამაშში წააგო.
ამ მარცხით რუსი ჩოგბურთელი რეიტინგის საუკეთესო ათეულში ადგილს დაკარგავს და მე-9-დან მე-14 ადგილზე დაქვეითდება.
ბენჟამინ ბონზი შემდეგ ეტაპზე ავსტრალიელ ჯორდან ტომპსონს დაუპირისპირდება, რომელმაც ჩეხ კოპრივას 5 სეტში მოუგო.
