"სანტოსი ჩემი ადგილია, ჩემი სახლი. თქვენთან ერთად მინდა მივაღწიო იმ მიზნებს, რომლებისთვისაც ჯერ კიდევ არ მიგვიღწევია", - განაცხადა ნეიმარმა სანტოსთან კონტრაქტის კიდევ ერთხელ გახანგრძლივების შემდეგ.
ბრაზილიურმა გრანდმა ოფიციალურად გამოაცხადა, რომ 33 წლის სუპერ ვარსკვლავი მათ რიგებში 2026 წლის 31 დეკემბრამდე დარჩება.
ნეი სანტოსში 2025 წლის იანვრის ბოლოს დაბრუნდა და გასულ წელს გუნდთან ორი 6-თვიანი კონტრაქტი გააფორმა.
გასული სეზონის ბრაზილიის სერია A-ს 20 მატჩში 8 გოლი და 1 ასისტი მიითვალა, განსაკუთრებით ბოლო ტურებში მოუმატა (ბოლო 5 ტურში - 5 გოლი და 1 ასისტი), რითაც გუნდი უმაღლესი დივიზიონიდან გავარდნას გადაარჩინა.
ნეიმარის მიზანი ბრაზილიის ნაკრებში დაბრუნება და 2026 წლის მსოფლიო ჩემპიონატზე თამაშია - სელესაოს მაისური ბოლოს 2023 წლის ოქტომბერში მოირგო.
