უპამეკანო და კონატე გამოირიცხა — რეალი მცველს ეძებს და ორი ვარიანტი მოინიშნა

რეალი ცენტრალური დაცვის ხაზის გაძლიერებას გეგმავს.

მადრიდული კლუბი ბაზარს სწავლობს იმ ფეხბურთელების მოსაძებნად, რომლებსაც ამ პოზიციის გაძლიერება შეუძლიათ. თუმცა, ზამთრის სატრანსფერო ფანჯარის ტრანსფერები ნაკლებად მოსალოდნელია. 

ადრე იწერებოდა, რომ სამეფო კლუბი დაიო უპამეკანოს ბაიერნიდან ან იბრაჰიმა კონატეს ლივერპულიდან დამატებას განიხილავდა — ორივე ფეხბურთელს კონტრაქტი სეზონის ბოლოს ეწურება. თუმცა ESPN-ის ინფორმაციით, ეს ტრანსფერები პრაქტიკულად გამორიცხულია.

რაც შეეხება მარკ გეჰის კრისტალ პალასიდან, ფეხბურთელს რეალში გადასვლის ვარიანტი საინტერესო იქნებოდა, თუმცა მადრიდელები მისთვის შეთავაზების გაკეთებას არ გეგმავენ, მიუხედავად იმისა, რომ ისიც, კონატეს და უპამეკანოს მსგავსად, ზაფხულში თავისუფალი აგენტი იქნება.

რეალის სკაუტებმა ძალიან დადებითი შეფასება მისცეს ორ ცენტრალურ მცველს: ჟერემი ჟაკეს რენიდან და ნიკო შლოტერბეკს დორტმუნდის ბორუსიიდან.

ფრანგმა ფეხბურთელმა მადრიდელების ყურადღება ჯერ კიდევ ევროპის 19-წლამდე ჩემპიონატის დროს მიიპყრო. მას შემდეგ ესპანეთის დედაქალაქის კლუბი მას ყურადღებით აკვირდება.

ცენტრალური მცველის ძებნას მადრიდელებს ის ფაქტი აიძულებს, რომ მომავალ ზაფხულს კონტრაქტი ეწურებათ დავიდ ალაბას და ანტონიო რუდიგერს და თუ გერმანელის მომავალი ჯერ ჰაერშია გამოკიდული, ავსტრიელის მადრიდიდან აბარგება თითქმის დადასტურებული ფაქტია.