საფრანგეთში მატჩების ჩაწყობის საქმეზე მიმდინარე ანტიკორუფციული გამოძიების გამო, კოტ-დ’ივუარის ნაკრების 23 წლის თავდამსხმელ ელი ვაჰის კანადის საიმიგრაციო სამსახურმა ქვეყანაში შესვლის უფლება არ მისცა.
ამ გადაწყვეტილების გამო ფეხბურთელი იძულებულია აშშ-ში დარჩეს და მსოფლიო ჩემპიონატის უმნიშვნელოვანესი მატჩი გამოტოვოს გერმანიის წინააღმდეგ, რომელიც ტორონტოში გაიმართება.
გამოძიება ეხება მიმდინარე წლის 17 მაისს საფრანგეთის ლიგა 1-ის შეხვედრას ნიცასა და მეცს შორის, სადაც ვაჰი, რომელიც მაშინ ნიცაში იჯარით თამაშობდა, განზრახ ყვითელი ბარათის მიღებაშია ეჭვმიტანილი. ამ გაფრთხილების გამო მან დისკვალიფიკაცია მიიღო და უმნიშვნელოვანესი პლეი-ოფის პირველი მატჩი გამოტოვა სენტ-ეტიენთან.
საფრანგეთის ფეხბურთის ფედერაციას ანტიკორუფციულმა სამსახურმა მიაწოდა ინფორმაცია, რომ კონკრეტულად ვაჰის ყვითელ ბარათზე უჩვეულოდ დიდი რაოდენობის ფსონები დაფიქსირდა. მიუხედავად იმისა, რომ საფრანგეთში დაკავების შემდეგ მისთვის ოფიციალური ბრალი ჯერ არ წარუდგენიათ და აშშ-ში მუნდიალზე გამგზავრების ნება დართეს, კანადის ხელისუფლებამ მაინც მაქსიმალური სიმკაცრე გამოიჩინა.
საფეხბურთო პლატფორმებზე გულშემატკივართა აზრები ორად გაიყო. ნაწილი მიიჩნევს, რომ ტოტალიზატორების გავლენამ თანამედროვე სპორტი გაანადგურა და რომ მსგავსი ქმედებები მკაცრად უნდა დაისაჯოს. ინტერნეტმომხმარებელთა მეორე ნაწილი კი კანადის მთავრობას უდანაშაულობის პრეზუმფციის დარღვევაში ადანაშაულებს და აცხადებს, რომ სანამ ბრალი ოფიციალურად არ დამტკიცდება, მსოფლიო ჩემპიონატის მატჩის გამოტოვება უსამართლობაა.
