ბარსელონას პრეზიდენტმა ჟოან ლაპორტამ ხულიან ალვარესის ზაფხულის სატრანსფერო საგაზე საჯაროდ ისაუბრა და დაადასტურა, რომ კატალონიურმა კლუბმა მადრიდის ატლეტიკოს არგენტინელი ფორვარდის სანაცვლოდ 100 მილიონი ევრო ოფიციალურად შესთავაზა.
ლაპორტას თქმით, ატლეტიკომ წინადადების განხილვაზეც კი უარი თქვა. მადრიდელთა აღმასრულებელმა დირექტორმა, მიგელ ანხელ ხილ მარინმა მას განუცხადა, რომ ალვარესის გაყიდვას არ აპირებდნენ, რადგან მისი შემცვლელი არ ჰყავდათ.
მე მას ვუთხარი, რომ თუ უარის უკან სხვა მიზეზები იდგა, პირდაპირ უნდა ეთქვათ, რადგან მათი ქცევა მიუღებელი იყო. მაქვს ახსნა, თუ რა მოხდა სინამდვილეში, მაგრამ ამაზე საჯაროდ არ ვისაუბრებ, რადგან მტკიცებულებები არ გამაჩნია
მიუხედავად ამისა, ლაპორტამ ხაზი გაუსვა, რომ ალვარესის თემა უკვე წარსულს ჩაბარდა. ის სრულიად კმაყოფილია ბარსელონას ამჟამინდელი შემადგენლობით და სპორტული დირექტორის, დეკუს მუშაობით.
გარდა სატრანსფერო საკითხებისა, ლაპორტამ მკაცრად გააკრიტიკა ეროვნული ნაკრებების მატჩებისთვის განკუთვნილი საერთაშორისო კალენდარი. მისი თქმით, მუდმივი შესვენებები კლუბის რიტმს არღვევს და ფეხბურთელებს ფიზიკურად ანადგურებს. ამ პრობლემაზე მასთან გუნდის მთავარმა მწვრთნელმა, ჰანსი ფლიკმაც ისაუბრა. ლაპორტამ მაგალითად გასულ სეზონში რაფინიას შემთხვევა მოიყვანა, ბრაზილიელი შემტევი შესანიშნავ ფორმაში იყო, თუმცა გადატვირთული გრაფიკისა და შორ მანძილზე მუდმივი ფრენების გამო, სამწვრთნელო შტაბის გაფრთხილების მიუხედავად, სერიოზული ტრავმა მიიღო.
