ქართველი კარატისტებისთვის საერთაშორისო ასპარეზზე წარმატებული სერია გრძელდება.
ამჯერად ჩვენმა სპორტსმენებმა საკუთარ კედლებში, სამშობლოში გულშემატკივრის დიდი მხარდაჭერით ისარგებლეს და კონტაქტურ კარატეში ბათუმში გამართულ პრესტიჟულ ღია შეჯიბრებაზე შთამბეჭდავი შედეგი დააფიქსირეს. ტურნირი ქართველების სრული დომინაციით წარიმართა და ჩვენი ქვეყნის წარმომადგენლებმა ჯამში 55 მედალი მოიპოვეს.
მუხრან ვახტანგაძის სახელობის სპორტის სასახლეში ჩატარებულ ბათუმის გრან პრიზე, უფროსებს შორის ოთხმა ქართველმა კარატისტმა იზეიმა ჩემპიონობა. ოქროს მედლები მარიამ წიკლაურმა (55 კგ), დავით ძნელაძემ (60 კგ), ანდრეი ზინჩენკომ (70 კგ) და დავით მსხალაძემ (+80 კგ) დაისაკუთრეს.
გარდა ამ ოთხი ტრიუმფისა, საქართველოს ნაკრების წევრების საერთო მონაგარი 15 ოქროს, 10 ვერცხლისა და 30 ბრინჯაოს მედალს შეადგენს.
ამ მასშტაბურ სპორტულ ღონისძიებაში მონაწილეობას 15 სხვადასხვა ქვეყნის 394 სპორტსმენი იღებდა. გამარჯვებულები სულ ხუთ ასაკობრივ კატეგორიაში გამოვლინდნენ. ორგანიზატორთა განცხადებით, ტურნირის აჭარაში ჩატარების უმთავრესი მიზანი რეგიონში სპორტის ამ სახეობის კიდევ უფრო მეტად პოპულარიზაცია იყო.