ბარსას ვარსკვლავი პოზიციას იცვლის?

ბარსელონასა და ესპანეთის ეროვნული ნაკრების 18 წლის ვარსკვლავმა, ლამინ იამალმა განაცხადა, რომ მომავალში ფლანგიდან მოედნის ცენტრში გადაინაცვლებს და კლუბის ლეგენდის, ლიონელ მესის საფეხბურთო ევოლუციას გაიმეორებს.

ფენომენალური შემტევი მიიჩნევს, რომ ეს ნაბიჯი გარდაუვალია მეტოქეების მხრიდან მუდმივი სამმაგი მეურვეობის თავიდან ასაცილებლად.

მესის გზის გამეორება და სამმაგი მეურვეობა

El Mundo-სთან ინტერვიუში თინეიჯერმა თავისი ტაქტიკური ხედვა დეტალურად განმარტა და პარალელი არგენტინელ ხატთან გაავლო, რომელიც კარიერის დასაწყისში ასევე ფლანგზე თამაშობდა, შემდეგ კი მოედნის ცენტრალურ გამთამაშებლად იქცა:

ვფიქრობ, ლეოსაც მუდმივად სამი ფეხბურთელი მეურვეობდა. ერთადერთი ადგილი, სადაც სამი მოთამაშე ერთდროულად ვერ დაგიდგება, მოედნის ცენტრია - იქ ისედაც ბევრი ხალხია და სიმჭიდროვეა. დროთა განმავლობაში სწორედ ცენტრში გადავალ, რადგან ფლანგზე სამი მცველით თამაში მეტოქისთვის მარტივია, ცენტრში კი ამას ვერ მოახერხებენ

უფრო პროდუქტიული და გადამწყვეტი საფრთხე

ამჟამად იამალი მარჯვენა ფლანგის შეუცვლელი ფიგურაა, სადაც თავისი სისწრაფითა და დრიბლინგით მეტოქის დაცვას წარმატებით შლის. თუმცა, ფეხბურთელი გრძნობს, რომ მისი პოტენციალი მოედნის ცენტრში, დაცვის ხაზებს შორის სივრცეებში ბევრად უფრო მაღალია:

ცენტრში მეტოქეების პირისპირ მიღება შემიძლია. იქ გაცილებით უფრო სახიფათო და გადამწყვეტი მოთამაშე ვარ, ვიდრე ფლანგზე. ახლა გუნდისთვის ფლანგზე ყოფნა სჯობს, მაგრამ მოვა დრო, როცა ცენტრში უფრო პროდუქტიული ვიქნები და საბოლოოდ იქ დავასრულებ.

იამალმა აღნიშნა, რომ მოედანზე განსაკუთრებულ ყურადღებას უკვე მიეჩვია. ხშირად მის წინააღმდეგ რამდენიმე მცველი ერთდროულად თამაშობს, თუმცა ის ამას მშვიდად ხვდება და პარტნიორების თავისუფალი სივრცეების გამოყენებას ცდილობს:

მწვრთნელი მეუბნება, რომ თუ ჩემს წინააღმდეგ სამი მცველია, ესე იგი ჩვენი სამი ფეხბურთელი თავისუფალია. რაც შეეხება დრიბლინგს, ეს სუფთა იმპროვიზაციაა, მისი წინასწარ დაგეგმვა შეუძლებელია

მესის მემკვიდრე 40 წლამდე?

მსოფლიო ჩემპიონატზე საუდის არაბეთთან მატჩის წინ, იამალის გარშემო აჟიოტაჟი პიკს აღწევს. მეტოქის მწვრთნელმა, გეორგიოს დონისმაც კი აღნიშნა, რომ 18 წლის ბიჭმა მესის წასვლით დატოვებული სიცარიელე ბარსელონაში საუკეთესოდ შეავსო და მოედანზე საოცარ მომწიფებულობას აჩვენებს.

მიუხედავად ასეთი შეფასებებისა, იამალი რეალობას ფხიზლად უყურებს. როდესაც მას ჰკითხეს, შეძლებდა თუ არა მესის მსგავსად 40 წლამდე უმაღლეს დონეზე თამაშს, მისი პასუხი მოკლე და კატეგორიული იყო: „ეს შეუძლებელია. აბსოლუტურად შეუძლებელია“.