ჩემპიონთა ლიგა - დღე 1: რას უნდა ველოდოთ თითოეულ მატჩში?

2026/27 წლების უეფას ჩემპიონთა ლიგის ლიგის ეტაპი სამშაბათს იწყება და პირველივე ტურში არაერთი საინტერესო დაპირისპირება გველოდება.

საკლუბო ფეხბურთის ყველაზე პრესტიჟული ტურნირის მორიგი სეზონის დაწყების წინ თითოეული მატჩის მთავარ ფაქტებსა და სტატისტიკურ მონაცემებს გადავხედოთ, რომელიც უეფას ოფიციალურმა გვერდმა მოამზადა.

სამშაბათი, 8 სექტემბერი

ბრიუგე - ასტონ ვილა (20:45)

ეს ამ გუნდების მე-4 შეხვედრა იქნება. 2024/25 წლების ჩემპიონთა ლიგის მე-4 ტურში ბრიუგემ საკუთარ მოედანზე 1:0 მოიგო, ხოლო შემდეგ, მერვედფინალში, ასტონ ვილამ ჯერ სტუმრად 3:1, შემდეგ კი შინ 3:0 გაიმარჯვა.

ბრიუგეს უეფას ტურნირებზე ჩატარებული ბოლო 22 საშინაო მატჩიდან მხოლოდ 3 აქვს წაგებული (13 მოგება, 6 ფრე). ამასთან, ბოლო 7 ევროპული საშინაო შეხვედრიდან ექვსში ბელგიურმა გუნდმა მინიმუმ 3 გოლი გაიტანა.

ბრიუგე ბოლო 9 სეზონში მერვედ მონაწილეობს ჩემპიონთა ლიგის ძირითად ეტაპზე.

ასტონ ვილამ გასული სეზონის წარმატებული ევროპა ლიგის კამპანიისას ჩატარებული 15 მატჩიდან 13 მოიგო და მხოლოდ 2 წააგო.

ვილას უეფას ტურნირების ჯგუფურ/ლიგის ეტაპზე ჩატარებული ბოლო 21 მატჩიდან მხოლოდ 3 აქვს წაგებული (16 მოგება, 2 ფრე).

უნაი ემერის გუნდმა ბოლო 16 ევროპული მატჩიდან ცხრაში კარი მშრალად შეინახა.

აეკ ათენი - ლასკი (20:45)

ათენის აეკს უეფას ტურნირებზე ჩატარებული ბოლო 11 საშინაო მატჩიდან 9 აქვს მოგებული (1 ფრე, 1 წაგება).

აეკი ჩემპიონთა ლიგის ჯგუფურ/ლიგის ეტაპზე მეექვსედ ითამაშებს, თუმცა ეს 2018/19 წლების სეზონის შემდეგ პირველად მოხდება.

ჩემპიონთა ლიგის ჯგუფურ/ლიგის ეტაპზე აეკის ბოლო 22 მატჩიდან მხოლოდ 1 დასრულდა უგოლოდ.

ლასკისთვის ეს ჩემპიონთა ლიგის ჯგუფურ/ლიგის ეტაპზე სადებიუტო სეზონია.

ავსტრიულმა კლუბმა გასულ სეზონში ჩემპიონატისა და თასის დუბლი შეასრულა. ეს მათთვის პირველი მნიშვნელოვანი ტიტულები იყო 1964/65 წლების სეზონის შემდეგ, როდესაც ასევე ორივე ტურნირი მოიგეს.

ლასკმა ევროპულ ტურნირებზე 11-მატჩიანი მოუგებელი სერია (4 ფრე, 7 წაგება) მაშინ დაასრულა, როდესაც პლეი-ოფის საპასუხო შეხვედრაში სელტიკი 5:1 დაამარცხა და ლიგის ეტაპის საგზური მოიპოვა.

რეალი - ინტერი (23:00)

თუ რეალის თავდამსხმელი კილიან მბაპე გოლს გაიტანს, ჩემპიონთა ლიგის ყველა დროის საუკეთესო ბომბარდირთა სიაში მე-5 ადგილს გაიყოფს. ამჟამად მას 70 გოლი აქვს და რაულ გონსალესს 1 ბურთით ჩამორჩება.

თუ ტიბო კურტუა ითამაშებს, ჩემპიონთა ლიგაზე მე-100 მატჩს ჩაატარებს და ისტორიაში 56-ე ფეხბურთელი გახდება, რომელმაც ამ ნიშნულს მიაღწია.

რეალის მთავარი მწვრთნელი ჟოზე მოურინიო თავის ყოფილ გუნდს, ინტერს დაუპირისპირდება. პორტუგალიელმა სპეციალისტმა მილანურ კლუბთან ერთად 2009/10 წლების სეზონში ჩემპიონთა ლიგა მოიგო და ტრებლი შეასრულა.

რეალმა ამ გუნდებს შორის გამართული ბოლო 7  მატჩიდან 6 მოიგო და მხოლოდ 1 წააგო.

მადრიდელებმა იტალიური კლუბების წინააღმდეგ ჩატარებული ბოლო 21 შეხვედრიდან 19 მოიგეს და მხოლოდ 2 წააგეს.

სამეფო კლუბმა ჩემპიონთა ლიგის ბოლო 19 სეზონიდან 17-ში პირველი ტურის მატჩი გამარჯვებით დაასრულა და მხოლოდ 2-ჯერ დამარცხდა.

ინტერს ესპანური კლუბების წინააღმდეგ სტუმრად ჩატარებული ბოლო 13 მატჩიდან არცერთი მოუგია (4 ფრე, 9 წაგება). უკანასკნელად მილანელებმა ესპანეთში 2004/05 წლების ჯგუფურ ეტაპზე იმარჯვეს, როდესაც ვალენსია 5:1 დაამარცხეს.

ნერაძურიმ ჩემპიონთა ლიგის ბოლო 19 მატჩიდან მხოლოდ ორში ვერ შეძლო გოლის გატანა.

ჩემპიონთა ლიგის ლიგის ეტაპზე ინტერის ბოლო 15 მატჩიდან არცერთი დასრულებულა ფრედ - 11 მოგება და 4 წაგება.

დორტმუნდი - ვილიარეალი (23:00)

ამ გუნდების ერთადერთი წინა შეხვედრა გასულ სეზონში, მე-5 ტურში გაიმართა და დორტმუნდმა საკუთარ მოედანზე 4:0 გაიმარჯვა.

დორტმუნდს ესპანური გუნდების წინააღმდეგ შინ ჩატარებული ბოლო 15 მატჩიდან მხოლოდ 2 აქვს წაგებული (9 მოგება, 4 ფრე), ხოლო ბოლო 3 შეხვედრა მოიგო.

გასულ სეზონში BVB-მ ლიგის ეტაპის პირველ 3 მატჩში 4-4 გოლი გაიტანა.

ვილიარეალს გერმანული კლუბების წინააღმდეგ ჩატარებული ბოლო 10 შეხვედრიდან მხოლოდ 2 აქვს მოგებული (4 ფრე, 4 წაგება).

ინიგო პერესის გუნდი ჩემპიონთა ლიგის ჯგუფურ/ლიგის ეტაპზე ზედიზედ მე-2 სეზონში მონაწილეობს, რაც კლუბის ისტორიაში პირველად ხდება.

ჩემპიონთა ლიგის ძირითად ეტაპზე ვილიარეალის ბოლო 31 მატჩიდან არცერთი დასრულებულა 0:0.

პორტუ - მანჩესტერ სიტი (23:00)

პორტუ ჩემპიონთა ლიგის ჯგუფურ/ლიგის ეტაპზე 28-ედ მონაწილეობს. ამ მაჩვენებლით კლუბი ისტორიაში მე-4 ადგილზეა და მხოლოდ რეალს (31), ბარსელონასა (31) და ბაიერნს (30) ჩამორჩება.

პორტუს ინგლისური კლუბების წინააღმდეგ ჩატარებული ბოლო 16 მატჩიდან მხოლოდ 2 აქვს მოგებული (4 ფრე, 10 წაგება).

„დრაკონებს“ უეფას ტურნირებზე ჩატარებული ბოლო 14 საშინაო მატჩიდან მხოლოდ 1 აქვთ წაგებული (10 მოგება, 3 ფრე).

მანჩესტერ სიტისთვის ეს ევროპის ჩემპიონთა თასზე/ჩემპიონთა ლიგაზე ჩატარებული 150-ე მატჩი იქნება.

სიტის პორტუგალიური კლუბების წინააღმდეგ ჩატარებული 11 შეხვედრიდან მხოლოდ 2 აქვს წაგებული (6 მოგება, 3 ფრე), თუმცა ბოლო მატჩში, 2024/25 წლების ჩემპიონთა ლიგის მე-4 ტურში, სპორტინგთან 1:4 დამარცხდა.

მანჩესტერ სიტიმ ჩემპიონთა ლიგაზე ბოლო 9  გასვლითი მატჩიდან 6 წააგო (2 მოგება, 1 ფრე).

ლილი - ბეტისი (23:00)

ლილს ესპანური კლუბების წინააღმდეგ საკუთარ მოედანზე ჩატარებული 9 მატჩიდან მხოლოდ 1 აქვს წაგებული (3 მოგება, 5 ფრე). ბოლო ასეთი შეხვედრა 2024/25 წლების ჩემპიონთა ლიგის მე-2 ტურში გაიმართა, როდესაც ფრანგულმა გუნდმა მადრიდის რეალი 1:0 დაამარცხა.

LOSC-მა ჩემპიონთა ლიგის ძირითად ეტაპზე ჩატარებულ ბოლო 9 შეხვედრაში გოლი ყველა მატჩში გაიტანა.

ლილის ბოლო 34 ევროპული შეხვედრიდან არცერთი დასრულებულა 0:0.

ბეტისს ევროპის ჩემპიონთა თასზე/ჩემპიონთა ლიგაზე აქამდე მხოლოდ ერთხელ, 2005/06 წლების სეზონში უთამაშია, როდესაც ჯგუფში მე-3 ადგილი დაიკავა.

ბეტისს ფრანგული გუნდების წინააღმდეგ ჩატარებული ბოლო 7 მატჩიდან მხოლოდ 2 აქვს წაგებული (2 მოგება, 3 ფრე).

ესპანურმა კლუბმა უეფას ტურნირების ჯგუფურ/ლიგის ეტაპზე ჩატარებული ბოლო 10 მატჩიდან მხოლოდ 1 წააგო (7 მოგება, 2 ფრე).