,,დახმარება მჭირდება" - პორიე დაკავების ვიდეოს ეხმაურება

დასტინ პორიე აღიარებს, რომ ბოლო დროს კანონდარღვევებთან დაკავშირებული პრობლემების შემდეგ დახმარება სჭირდება.

ამ კვირის დასაწყისში პორიე ატლანტის აეროპორტში დააკავეს მას შემდეგ, რაც საზოგადოებრივ ადგილას სიმთვრალის გამო თვითმფრინავიდან ჩამოსვეს.

სამშაბათს პოლიციის სხეულის კამერით გადაღებული კადრებიც გავრცელდა, სადაც ჩანს, როგორ აგინებს უკიდურესად გაღიზიანებული პორიე აეროპორტის თანამშრომლებს და შემდეგ დაკავებამდე პოლიციელთან ჩხუბსაც კი ცდილობს.

ინციდენტის შემდეგ პორიემ სოციალურ ქსელში მოკლე განცხადება გამოაქვეყნა, სადაც აღნიშნა, რომ „საკუთარ თავზე მუშაობს“, თუმცა დამატებითი კომენტარი არ გაუკეთებია.

მან ინსტაგრამზე ახალი განცხადება გაავრცელა:

იმ ეტაპზე ვარ, როცა დახმარება მჭირდება. ბრძოლებიდან წასვლა ჩემთვის მარტივი არ ყოფილა და ალკოჰოლი პასუხი ნამდვილად არ არის. მან მამაჩემის ცხოვრება გაანადგურა და მე არ დავუშვებ, რომ ჩემი ან ჩემი ოჯახის ცხოვრებაც დაანგრიოს. ჩემს ოჯახს ჩემი საუკეთესო ვერსია ეკუთვნის. ყველაფერს ვაკეთებ, რომ გონება სწორად დავალაგო და სწორი ნაბიჯები გადავდგა.

პორიემ 2025 წელს, UFC 318-ზე ნიუ ორლეანში მაქს ჰოლოუეისთან დამარცხების შემდეგ დაასრულა კარიერა.

მას შემდეგ ის ღიად საუბრობს იმ სირთულეებზე, რომლებიც პენსიაზე გასვლას ახლავს. Full Send MMA-სთან ინტერვიუში მან თქვა:

თუ რაიმე მიზნისკენ არ მივისწრაფვი ან ჩემი ოჯახის უკეთესობისთვის არ ვშრომობ, საკუთარი თავისთვის საფრთხედ ვიქცევი.

კარიერის დასრულების შემდეგ პორიე კვლავ აგრძელებს ვარჯიშს და American Top Team-ში მებრძოლებთან მუშაობას.

ის ასევე მონაწილეობს UFC-ის ტრანსლაციებში და რეგულარული სტუმარია UFC on Paramount-ის გადაცემაში Deep Waters, სადაც UFC-ის სამყაროში მიმდინარე სიახლეებს განიხილავს.