დამცირება ბარსელონაში? - რატომ აუჯანყდა პოლონეთი კატალონიურ გრანდს?

რობერტ ლევანდოვსკის მომავალი ბარსელონაში ჩიხში შევიდა.

MARCA-ს ინფორმაციით, კატალონიურმა კლუბმა პოლონელ ფორვარდს კონტრაქტის მხოლოდ ერთი წლით გაგრძელება შესთავაზა, თანაც გაცილებით დაბალი ფინანსური პირობებით. ამ ფაქტმა ფეხბურთელის სამშობლოში ნამდვილი მძვინვარება გამოიწვია.

პოლონეთში მიიჩნევენ, რომ ბარსელონა თავის ვარსკვლავს სათანადო პატივს არ სცემს. მიუხედავად იმისა, რომ თავად რობერტი თავს ქალაქში კომფორტულად გრძნობს, მასზე ზეწოლა პოლონური მედიისა და ვეტერანების მხრიდან იზრდება.

„მოიქეცი კაცივით“ - პოლონელი ლეგენდის მწვავე მოწოდება

განსაკუთრებით მკაცრი იყო პოლონეთის ნაკრების ყოფილი წევრი, იან ტომაშევსკი, რომელმაც ლევანდოვსკის კლუბიდან წასვლა ურჩია:

რობერტ, მოიქეცი როგორც კაცს შეეფერება. შენ ვინმე უბრალო ადამიანი არ ხარ, შენ ისტორიაში ყველაზე ცნობილი პოლონელი ხარ! როგორ აძლევ უფლებას ბარსელონას, ასე მოგექცეს?

მისივე თქმით, ლევანდოვსკი MLS-ში თუ ევროპის სხვა გუნდში ისეთ დაფასებას მიიღებს, როგორსაც იმსახურებს, ბარსელონამ კი „აკეთოს ის, რაც უნდა“.

ფლიკის გეგმები და შემცირებული როლი

ბარსელონა პოზიციას არ ცვლის: მათ შესთავაზეს ფეხბურთელს დარჩენა, თუმცა გარანტირებული სასტარტო ადგილის გარეშე. მიმდინარე სეზონში ჰანსი ფლიკმა უკვე რამდენჯერმე დატოვა პოლონელი სათადარიგო სკამზე საკვანძო მომენტებში, რაც მიანიშნებს, რომ კლუბი მასზე, როგორც მთავარ ფორვარდზე, იმედებს აღარ ამყარებს.