FIFA-ს პრეზიდენტმა, ჯანი ინფანტინომ განაცხადა, რომ ალესანდრო დელ პიეროა იმ იდეის ავტორი, რომლის მიხედვითაც მსოფლიო ჩემპიონატზე მატჩისწინა მოედანზე გამოსვლის წესი შეიცვალა და მასში სასტარტო 11 ფეხბურთელის ნაცვლად, განაცხადში მყოფი 26-ვე მოთამაშე მონაწილეობს.
ჩრდილოეთ ამერიკაში მიმდინარე 2026 წლის მსოფლიო ჩემპიონატზე თამაშის წესებში არაერთი ცვლილება შევიდა. ზოგიერთი მათგანი გულშემატკივარმა კარგად მიიღო, ზოგი კი – ნაკლებად.
რევოლუცია ფეხბურთში - შეცვლილი წესები 2026 წლის მუნდიალზე
ერთ-ერთი სიახლე, რომელმაც თითქმის ყველას მოწონება დაიმსახურა, არის გადაწყვეტილება, რომ ჰიმნების შესრულებისას მოედანზე გუნდის 26-ვე წევრი გამოვიდეს. ეს ცვლილება ყველა ფეხბურთელს აძლევს შანსს, იგრძნოს მომენტი და გუნდის სრულფასოვანი ნაწილი იყოს, განსაკუთრებით მათთვის, ვისაც ტურნირზე თამაშის შესაძლებლობა, შესაძლოა, საერთოდ არ მიეცეს.
ბოლო პრესკონფერენციაზე ინფანტინომ გააჟღერა, რომ ეს იდეა მას თავდაპირველად ყოფილმა იტალიელმა ვარსკვლავმა, ალესანდრო დელ პიერომ მიაწოდა:
ისტორიაში პირველად, მოედანზე გუნდის ყველა, ანუ 26-ვე მოთამაშე ერთად იქნება. იქნება გიგანტური დროშები და ჰიმნები მთელი გუნდის თანხლებით გაჟღერდება. საიდან გაჩნდა ეს იდეა? მოგეხსენებათ, ჩვენ ყოველთვის გვინდა სიახლეების დანერგვა. ვფიქრობდით, რომ ეს უნდა ყოფილიყო რაღაც ამერიკული სტილის შოუ ან ბიზნეს-იდეა, თუმცა, ყველაფერი სულ სხვაგვარად მოხდა.
ეს იდეა დაიბადა საუბრიდან, რომელიც ალესანდრო დელ პიეროსთან მქონდა. რამდენიმე თვის წინ ალესანდრომ მკითხა: ‘რატომ არ გამოგყავთ ჰიმნის დროს მოედანზე ყველა ფეხბურთელი?’. მე ვკითხე: ‘რატომ?’, მან კი მიპასუხა: ‘იმიტომ, რომ ჩვენ ყველანი ერთი გუნდის ნაწილი ვართ’.
