მსოფლიო ჩემპიონატის სასტარტო მატჩში ხორვატიის ნაკრებთან მოპოვებული გამარჯვების (4:2) შემდეგ, ბრიტანულ მედიასა და სოციალურ ქსელებში ჯუდ ბელინგემის ირგვლივ დისკუსია არ წყდება.
მადრიდის რეალის ვარსკვლავმა მოედანზე ბრწყინვალე მატჩი ჩაატარა და გოლიც გაიტანა. ტურნირის წინ მის მისამართით გაჟღერებულ კრიტიკას, თითქოს ნაკრები მის გარეშე უკეთ თამაშობს და მას ზედმეტი ამპარტავნება ახასიათებს, ინგლისის ნაკრების ყოფილი მცველი, რიო ფერდინანდი გამოეხმაურა.
ფერდინანდმა კატეგორიულად უარყო ყველა ბრალდება და ბელინგემი საჯაროდ დაიცვა:
ვერავისგან მივიღებ იმის თქმას, რომ ის გუნდის პრობლემაა. შეუძლებელია მიაღწიო იმას, რაც მან ფეხბურთში გააკეთა, თუ არ გაგაჩნია გარკვეული ამპარტავნება, ხასიათი, ქარიზმა და მოედანზე პირველობის ამბიცია. ეს თვისებები მას 10 წლის ასაკიდან, მთელი კარიერის განმავლობაში მოჰყვება.
რატომ უნდა შეიცვალოს ახლა, როცა ამ დონემდე მივიდა და გუნდის ერთ-ერთი ყველაზე საკვანძო ფიგურა გახდა? ტემპის დაწევას სთხოვთ? ამას ნამდვილად ვერ დავეთანხმები. ის არის ერთადერთი მოთამაშე, ჰარი კეინთან ერთად, რომლის ავტორიტეტი და გავლენა მოედანზე ყველაზე დიდ და გადამწყვეტ მომენტებში კიდევ უფრო იზრდება.
აღსანიშნავია, რომ ტურნირის წინ მთავარ მწვრთნელ თომას ტუხელსა და ბელინგემს შორის არსებულ გაუგებრობაზე ბევრი იწერებოდა, თუმცა ხორვატიასთან მატჩმა აჩვენა, რომ ათიანის პოზიციაზე ჯუდი შეუცვლელია.
