კანადის ნაკრების ისტორიული და დამაჯერებელი გამარჯვება კატართან (6:0) გუნდის ერთ-ერთი წამყვანი ნახევარმცველის, ისმაელ კონეს საშინელმა ტრავმამ დაჩრდილა.
მატჩის 50-ე წუთზე, როდესაც ანგარიში უკვე კანადელთა სასარგებლოდ იყო, კატარელი ასიმ მადიბოს უხეში ვარდნის შედეგად, 24 წლის ფეხბურთელმა მარცხენა ფეხი მოიტეხა. მოედანზე მყოფი მოთამაშეების სახეებზე მაშინვე აღიბეჭდა შოკი, როდესაც კოლეგის ფეხის მდგომარეობა დაინახეს.
კონეს სამედიცინო პერსონალმა ჟანგბადის ნიღაბი გაუკეთა და მოედანი საკაცით დაატოვებინა, რა დროსაც მან გულშემატკივრების აპლოდისმენტების საპასუხოდ ცერა თითი აწია. მადიბოს უხეშობა თავდაპირველად ყვითელი ბარათით შეფასდა, თუმცა VAR-ის გადამოწმების შემდეგ მთავარმა მსაჯმა ის მოედნიდან პირდაპირი წითელი ბარათით გააძევა.
ამ მძიმე ინციდენტიდან რამდენიმე წუთში, ნათან სალიბამ კანადელთა მეოთხე გოლი გაიტანა და აღნიშვნისას კონეს მაისური მაღლა ასწია, რითაც გოლი თავის მძიმედ დაშავებულ თანაგუნდელს მიუძღვნა. შეხვედრის ფინალური სასტვენის შემდეგ კი ემოციებმა კიდევ უფრო იფეთქა - სათადარიგოთა სკამებს შორის მოედანზე ფიზიკური დაპირისპირება მოხდა, რაც, სავარაუდოდ, კანადელთა მწვრთნელ ჯესი მარშსა და კატარელთა თავკაც ხულენ ლოპეტეგის შორის მომხდარმა დაძაბულმა ხელის ჩამორთმევამ გამოიწვია.
სერია ა-ს კლუბ სასუოლოს ნახევარმცველისთვის, რომელიც ბოლო თვეებში აქტიური სატრანსფერო ჭორების ეპიცენტრშია, ეს სადებიუტო მსოფლიო ჩემპიონატი იყო.
მატჩის შემდეგ ჯესი მარშმა კონეზე საუბრისას აღნიშნა, რომ ის საოცარი პიროვნებაა და შეუძლია ისეთი რაღაცების კეთება მოედანზე, რაც სხვა არცერთ ფეხბურთელს არ შეუძლია. მწვრთნელის თქმით, ის ბოსნიასთან მატჩშიც საუკეთესო იყო და მისი დაკარგვა ნაკრებისთვის უდიდესი დარტყმაა. გუნდის მცველმა მოიზე ბომბიტომაც დაადასტურა, რომ კონეს არყოფნა უდიდესი დანაკლისია და გუნდის ერთადერთი მიზანი ახლა მისი სახელისთვის ბრძოლაა.
