საქართველოს ეროვნული ნაკრების კაპიტანი, გურამ კაშია, სანაკრებო კარიერას ივნისში დაასრულებს. ამასთან დაკავშირებით, ალექსანდრე იაშვილმა კომენტარი გააკეთა.
"გურამ კაშია არის ერთ-ერთი ყველაზე გამორჩეული ფეხბურთელი, ვისაც ეროვნული ნაკრების მაისური სცმია. ის იყო მაგალითი თითოეული ჩვენგანისთვის, თუ რას ნიშნავს იყო ეროვნული ნაკრების მოთამაშე, სიამაყით ატარებდე შენი ქვეყნის მაისურს და უკაპიტნო შენს ქვეყანა ევროპის ჩემპიონატზე.
მთელი ფეხბურთის ფედერაციის სახელით, უდიდესი მადლობა ყველაფრისთვის. ვამაყობ, რომ გურამთან ერთად მომიწია თამაში, შემდეგ კი, ჩვენი ნაკრების კაპიტანი და გამორჩეული წევრი იყო. ყოველთვის მადლიერები ვიქნებით.
ჩვენი კარი ყოველთვის ღიაა შენთვის და, როდესაც გადაწყვეტ, რომ მზად ხარ, ჩვენთვის დიდი პატივი იქნება, თუ გააგრძელებ იმ საქმეში მოღვაწეობას, რასაც მთელი ცხოვრება ემსახურე და შენი ქვეყნისთვის ძალიან ბევრი გააკეთე. დარწმუნებული ვარ, მომავალში კიდევ უფრო მეტს გააკეთებ საქართველოსთვის", - განაცხადა იაშვილმა.
გურამ კაშიას დებიუტი ეროვნული ნაკრების რიგებში 2009 წელს, თბილისში, მონტენეგროსთან მატჩში შედგა. ამ დროისთვის, 38 წლის მცველს 128 სანაკრებო მატჩი აქვს ჩატარებული და ანგარიშზე 3 გოლია.
საქართველოს ნაკრებმა კაშიას კაპიტნობით 2024 წლის ევროპის ჩემპიონატზე პირველად ითამაშა, ჯგუფური ეტაპი წარმატებით დასძლია და ევროპის საუკეთესო 16 გუნდს შორის მოხვდა.
2 ივნისს, საქართველო-რუმინეთის ამხანაგურ შეხვედრაში, კაშიას 129-ე სანაკრებო მატჩი შედგება, რომელიც თბილისში, მიხეილ მესხის სახელობის სტადიონზე გაიმართება.
