სიახლეები
სეტანტა
სპორტის გურუ
ქვიზები
Copyright © 2023 Adjarabet Arena. All Rights Reserved.
-
Aa
+
ფონტის ზომა
დღეს, 6 ივლისს, გერმანიაში ევრო 2024-ს მეორე 1/4 ფინალური სათამაშო დღე გაიმართება და დღის ბოლოს, კიდევ ორი ნახევარფინალისტის ვინაობას გავარკვევთ.
ინგლისი - შვეიცარია [20:00]
გარეტ საუთგეიტის გუნდმა გავარდნის პირას ერთხელ უკვე გაიარა, როცა მერვედფინალში სლოვაკეთთან მატჩის გადარჩენა ჯუდ ბელინგემმა მსაჯის მიერ ბოლო კომპენსირებულ წუთზე, ულამაზესი გოლით მოახერხა. არადა, ინგლისი იმ მატჩში იმდენად ცუდი იყო, რომ მთელი თამაშის განმავლობაში ანგარიშის ჩამორჩენის მიუხედავად, ბელინგემის ის დარტყმა - პირველი ზუსტი დარტყმა იყო ინგლისელებისთვის მთელ თამაშში.
უკეთესი შთაბეჭდილება სამ ლომს არც ჯგუფში დაუტოვებია - იქაც, ბელინგემის გოლით გუნდმა პირველ ტურში სერბეთს მოუგო, შემდეგ კი აბსოლუტურმა ე.წ. "სნუზფესტმა" დაისადგურა - მოსაწყენმა სანახაობამ, სადაც გულშემატკივრები იმაზეც კი ხუმრობდნენ, რომ ინგლისის თამაშების ყურება არის უკიდურესი სასჯელის ერთ-ერთი ყველაზე მძიმე ფორმა.
საინტერესო ფაქტი ის არის, რომ ამ ევროპის ჩემპიონატზე ინგლისმა ჯერჯერობით 4 გოლი გაიტანა, საიდანაც 2 ბელინგემზე მოდის, 2 კი - ჰარი კეინზე. საუთგეიტის 26-კაციანი განაცხადიდან 24 ინგლისის პრემიერ ლიგას წარმოადგენს, თუმცა გოლებს სწორედ ის ორი კაცი იტანს - ერთი ესპანეთში რომ თამაშობს, მეორე კი გერმანიაში.
შვეიცარია სამივე თავის თამაშში ძალიან კარგი და შთამბეჭდავი იყო - ყველაფერი უნგრეთის დამაჯერებელი დამარცხებით დაიწყო (3:1), შემდეგ იყო ფრე შოტლანდიასთან, სადაც გამარჯვებასთან მაინც იაკინის გუნდი იყო უფრო ახლოს, ბოლო ტურში კი გერმანია შვეიცარიასთან მარცხს და ჯგუფში პირველი ადგილის დათმობას ბოლო წუთებზე გადაურჩა. ვინ იცის, საერთოდ თუ იყო საჭირო მაგ ჯგუფში პირველი ადგილისთვის ბრძოლა, რამეთუ გერმანიამ ჯგუფის მოგებით ბადის გაცილებით რთულ მხარეში ამოყო თავი.
მერვედფინალში შვეიცარიის მეტოქე იტალია იყო, რომელიც მურატ იაკინის გუნდმა აბსოლუტურად უშანსოდ და ყველანაირი კითხვის ნიშნების გარეშე დაამარცხა - ბევრი იმასაც ამბობდა, რომ ასე უშანსოდ და უბრძოლველად იტალია დიდი ტურნირიდან ისტორიაში პირველად გავარდა. შეგვიძლია რამდენიც გვინდა ვლანძღოთ ევროპის ჯერ კიდევ მოქმედი ჩემპიონი სკუადრა აძურა და მისი მწვრთნელი ლუჩანო სპალეტი, მაგრამ არ შეიძლება მურატ იაკინის და მისი შვეიცარიის მიმართ საქებარი სიტყვების დაშურება, იმიტომ რომ დღეს ეს გუნდი მარტივი დასამარცხებელი არავისთვის არ არის.
ინგლისსა და შვეიცარიას შორის აქამდე ისტორიაში 27 მატჩი გაიმართა, საიდანაც 19 ინგლისმა მოიგო, 5 მატჩი ფრედ დასრულდა და 3 გამარჯვება შვეიცარიელებს ერგოთ.
უკანასკნელად ეს ორი გუნდი ერთმანეთს 2022 წელს, ამხანაგურ მატჩში შეხვდნენ ერთმანეთს და მაშინ ინგლისმა 2:1 იმარჯვა, შვეიცარიის უკანასკნელი გამარჯვება კი შორეული 1981 წლით თარიღდება (2:1).
სავარაუდო შემადგენლობები
ინგლისი: პიკფორდი, უოკერი, სტოუნსი, კონსა, ტრიპიერი, მეინუ, რაისი, შოუ, ფოდენი, ბელინგემი, კეინი
დისკვალიფიცირებულია: გუეჰი
დისკვალიფიკაციის ზღვარზეა: ბელინგემი, ფოდენი, გალაჰერი, მეინუ, ტრიპიერი.
შვეიცარია: ზომერი, შერი, აკანჯი, როდრიგესი, ვიდმერი, ჯაკა, ფროილერი, აებიშერი, ნდოიე, ემბოლო, ვარგასი
დისკვალიფიკაციის ზღვარზეა: ფროილერი, ნდოიე, როდრიგესი, სიერო, ჯაკა.
ჩვენი პროგნოზი: ორივე გუნდი გაიტანს.
ნიდერლანდები - თურქეთი [23:00]
ბოლო მეოთხედფინალში ერთმანეთს ნიდერლანდების და თურქეთის ნაკრები დაუპირისპირდებიან.
რონალდ კუმანის გუნდი ამ ტურნირზე ორაზროვან შთაბეჭდილებას ტოვებს. ერთის მხრივ, გუნდმა ჯგუფში მხოლოდ პოლონეთს მოუგო (2:1) და მე-3 ადგილი დაიკავა, თუმცა მერვედფინალში კერკეტი რუმინეთი უშანსოდ 3:0 გაანადგურა და ნახევარფინალში გასვლის ფავორიტადაც მოიაზრება.
თავის მხრივ, თურქეთმა 2 მოგებით ჯგუფში მეორე ადგილი მხოლოდ დამატებითი მაჩვენებლების გამო დაიკავა და ბადის სასურველ მხარეშიც მოხვდა - მერვედფინალში გუნდმა ავსტრიასთან უდიდესი ბრძოლა გამოიარა და 2:1 უპირატესობის შენარჩუნება მაინც მოახერხა. განსაკუთრებით გენიალური გამოვიდა ბოლო წამებზე მეკარე გუნოკის მიერ შესრულებული სეივი, როცა მან პრაქტიკულად 3 მეტრიდან დარტყმული და მიწიდან ასხლეტილი თავური მოიგერია.
დღევანდელ მატჩში ვინჩენცო მონტელას გუნდს წინა მატჩის გმირი, მერიჰ დემირალი გამოაკლდება, რომელმაც დუბლი შეასრულა და დაცვაშიც დიდებული იყო, თუმცა მეორე გოლის აღნიშვნის დროს მისი ჟესტი უეფამ პოლიტიკურად მიიჩნია და დისკვალიფიკაციაც მიუსაჯა.
თურქეთთან ნიდერლანდების დაპირისპირების ისტორია 14 მატჩს შეადგენს - 6 გამარჯვება ნარინჯისფერებმა მოიპოვეს, 4 თურქეთმა, 4 მატჩი კი ფრედ დასრულდა. ამ 14 მატჩში ნიდერლანდებმა 21 გოლი გაიტანა, თურქეთმა კი - 14.
უკანასკნელი მატჩი 2021 წელს შედგა და ნიდერლანდების გამარჯვებით 6:1 დასრულდა, თურქეთის წინა გამარჯვება კი იმავე წლის საშინაო მატჩში შედგა (4:2).
სავარაუდო შემადგენლობები
ნიდერლანდები: ვერბრიუგენი, დუმფრისი, დე ვრეი, ვან დაიკი, აკე, შუტენი, სიმონსი, რეინდერსი, მალენი, დეპაი, გაკპო
დისკვალიფიკაციის ზღვარზეა: დუმფრისი, მალენი, შუტენი, ვეერმანი
თურქეთი: გუნოკი, მულდური, აკაიდინი, ბარდაკჩი, კადიოღლუ, იოკოსლუ, აიჰანი, ილდიზი, ჩალჰანოღლუ, აპლერ ილმაზი, გიულერი
დისკვალიფიცირებულია: დემირალი, კოკჩუ, იუკშეკი
დისკვალიფიკაციის ზღვარზეა: აიჰანი, ჩაკირი, ჩელიკი, გიულერი, გუნოკი, მულდური, ოზჩანი, ილდიზი.
ჩვენი პროგნოზი: ნიდერლანდები 2-1 თურქეთი
ნ
ნიკა შაქარაშვილი
კომენტარები