უეფას ერთა ლიგის 2024-25 წლების გათამაშების ჯგუფურ ეტაპზე 2 ტურია დარჩენილი. B ლიგის პირველ ჯგუფში საკმაოდ დაძაბული სიტუაციაა.
4 ტურის შემდეგ ჯგუფში მდგომარეობა ასეთია:
1. ჩეხეთი - 7 ქულა
2. საქართველო - 6 ქულა
3. ალბანეთი - 6 ქულა
4. უკრაინა - 4 ქულა
ჯერ-ჯერობით ამ ჯგუფში გადაწყვეტილი არაფერია და ნებისმიერ გუნდს შეუძლია პირველი ადგილის დაკავება.
მე-5 ტურში (16 ნოემბერი) საქართველოს ნაკრები ბათუმში, აჭარაბეთ არენაზე, უკრაინას მიიღებს, ალბანეთი კი ჩეხეთს უმასპინძლებს. მე-6 ტურში (19 ნოემბერი) ალბანეთი უკრაინას დაუპირისპირდება, საქართველო კი ჩეხეთს ესტუმრება.
დარჩენილ 2 მატჩში საქართველოსთვის წარმატებული შედეგი მნიშვნელოვანია.
საქართველოს ნაკრების განაცხადი ნოემბრის მატჩებისთვის
2026 წლის მსოფლიო ჩემპიონატზე კვალიფიკაცია
2024-25 წლების ერთა ლიგის გათამაშება დაკავშირებულია 2026 წლის მსოფლიო ჩემპიონატის საკვალიფიკაციო ეტაპთან. ტრადიციული საკვალიფიკაციო ეტაპის (2025 მარტი - 2025 ნოემბერი) ჯგუფების გამარჯვებული 12 გუნდი პირდაპირ მოიპოვებს მუნდიალის საგზურს.
ამ ჯგუფების მეორეადგილოსნებს კი პლეიოფში ერთა ლიგის ის საუკეთესო 4 გუნდი დაემატება, რომელიც საკვალიფიკაციო ეტაპზე თავის ჯგუფში პირველ და მეორე ადგილებზე ვერ მოხვდება. პლეიოფში (2026 წლის მარტი) 16 გუნდი 4 ბადედ დაიყოფა და 1/2 ფინალურ და ფინალურ თითო მატჩს ითამაშებენ, ბადეების გამარჯვებული 4 გუნდი კი მსოფლიო ჩემპიონატის საგზურს მოიპოვებს. ჯამში ევროპიდან მუნდიალზე 16 ქვეყნის ეროვნული გუნდი გავა.
როგორ უნდა მოხვდეს საქართველოს ნაკრები მსოფლიო ჩემპიონატზე?
ა) გავიდეს ტრადიციული საკვალიფიკაციო ეტაპის ჯგუფში პირველ ადგილზე.
ბ) გავიდეს ტრადიციული საკვალიფიკაციო ეტაპის ჯგუფში მეორე ადგილზე და შემდეგ პლეიოფში მოიგოს 2 მატჩი.
გ) მოხვდეს ერთა ლიგის იმ გუნდების საუკეთესო ოთხეულში, რომლებიც საკვალიფიკაციო ეტაპზე თავიანთი ჯგუფის პირველ და მეორე ადგილებზე ვერ გავიდნენ და შემდეგ პლეიოფში მოიგოს 2 მატჩი.
