საქართველოს ნაკრების კანდიდატთა გუნდმა ჩინეთში გამართულ სოლიდარობის საერთაშორისო თასზე გამოსვლა გამარჯვებით დაასრულა.
მარკო ესპოზიტოსა და ნიკა ცინცაძის გაწვრთნილმა გუნდმა ტურნირის ბოლო შეხვედრაში მონტენეგრო 6-ქულიანი სხვაობით დაამარცხა - 69:63.
ლევან გოგიჩაიშვილს 12 ქულა ჰქონდა, ნიკოლოზ გაფრინდაშვილს - 11 ქულა, 6 მოხსნა, რომან ჭინჭარაულმა 7 ქულა ჩაიწერა აქტივში, ხოლო 6-6 ქულა და 4-4 ასისტი მიითვალეს გიორგი კობახიძემ და ლუკა მაზიაშვილმა.
ტურნირზე მასპინძელი ჩინეთის, საქართველოს, ჩრდილოეთ მაკედონიისა და მონტენეგროს გუნდები ასპარეზობდნენ - ჩინეთის შემდეგ, ჩვენებმა მეორე ადგილი დაიკავეს.
ჩინეთში ნაჩვენები თამაშის მიხედვით, შესაძლოა, ალეკსანდარ ჯიკიჩმა 12 აგვისტოს დასაწყებ შეკრებაზე კონკრეტულ კალათბურთელს ან კალათბურთელებს ეროვნულ გუნდთან ინტეგრაციის საშუალება მისცეს.
